स्थानीय तहको निर्वाचन मिति घोषणा भएसँगै नेकपा एमालेमा प्रवेश गर्नेहरुको लहर चल्यो, ओलीले भित्र्याए सिन्धुलीमा दुईसय बढी नेता कार्यकर्ता
‘कुनै हालतमा संविधान संशोधन हुन दिइँदैन’
सिन्धुली, १२ फागुन । स्थानीय तहको निर्वाचन मिति घोषणा भएसँगै नेकपा एमालेमा प्रवेश गर्नेहरुको लहर चलेको छ ।
यो लहर विहिबार सिन्धुलीमा पनि देखियो । जहाँ विभिन्न पार्टीका दुई सयभन्दा बढी नेता कार्यकर्ता एमालेमा प्रवेश गरे । पार्टी प्रवेश गर्नेमा कांग्रेस र माओवादीका जिल्ला नेतादेखि राप्रपाका कार्यकर्तासम्म छन् ।
नेकपा एमाले सिन्धुलीले सिन्धुलीमाडीमा आज आयोजना गरेको ३६ औं ऋषिराज देवकोटा स्मृति दिवस एवम् जिल्ला प्रतिनिधि परिषद् उद्घाटन कार्यक्रममा एमाले अध्यक्ष केपी शर्मा ओलीले नवप्रवेशीलाई टिका र खादा लगाएर पार्टीमा स्वागत गरे ।
‘कुनै हालतमा संविधान संशोधन हुन दिइँदैन’
कार्यक्रममा अध्यक्ष ओलीले राष्ट्र र जनताको हितविपरीत संविधान संशोधन हुन नदिने बताए । अरुको इशारामा दलहरुले संविधान संशोधनको प्रस्ताव ल्याएको उनको आरोप थियो ।
संसदमा संविधान संशोधनको प्रस्तावलाई ल्याईएला तर कुनै पनि हालतमा एमालेले संविधान संशोधन प्रस्ताव पास गर्नै नदिने उनले दोहोर्याए ।
स्थानीय निकायको चुनाव हुन नदिनका लागि संविधान संशोधन अनावश्यकको विषय बनाइएको उनको भनाइ थियो ।
