धरानमा खतरनाक दुर्घटना: यात्रुबाहक बसको ठक्करबाट कार पूर्ण रुपमा क्षति, चालकसहित दुईजना सवार घाइते
धरान, चैत्र ४ । कोशी लोकमार्ग अन्तर्गत धरानको विश्वकर्मा मन्दिर भन्दा केही मुन्तिर शुक्रबार साँझ पौने ६ बजेतिर गम्भीर प्रकृतिको दुर्घटना भएको छ ।
दुर्घटनामा यात्रुबाहक बसको ठक्करबाट कार पूर्ण रुपमा क्षति पुगेको छ भने तीनजना घाइते भएका छन् । इटहरीबाट धरान तर्फ आउँदै गरेको को १ ख २१४४ नम्बरको यात्रुबाहक बसले तिब्र गतिका कारण धरानबाट जाँदै गरेको बा १३ च ७५०३ नम्बरको कारलाई ठक्कर दिएको थियो ।
ठक्करका क्रममा कारको एयर ब्यागका कारण चालकसहित दुईजना सवार घाइते बनेका हुन् । एयर व्यागका कारण गम्भीर प्रकृतिको क्षति हुनबाट बचेको प्रहरीले बताएको छ ।
घाइते हुनेमा रुपन्देही तिलोत्तमा नगरपालिका–१ का चालक २९ वर्षीय प्रकाश गिरी, काठमाडौं गोदावरी नगरपालिका–४ का २४ वर्षीय सिर्जन सिलवाल र हेटौडा भीमफेदी–७ का २९ वर्षीय प्रकाश गिरी रहेका छन् । बाहिरी चोट नदेखिए पनि भित्री चोट हुन सक्ने जिल्ला ट्राफिक प्रहरी कार्यालय धरानका प्रहरी जवान धनबहादुर बस्नेतले बताए ।
घाइते भएकाहरुको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको प्रज बस्नेतले बताए । कार आफ्नै लेनमा गइरहेको र ओभरटेक गर्ने क्रममा यात्रुबाहक बसले ठक्कर दिएको उनले बताए । घटना विश्वकर्मा मन्दिर भन्दा डेढसय मिटर तल भएको हो ।
