पर्यटकलाई हिड्न सजिलो होस् भन्दै पाख्रीबास सिमसार क्षेत्रमा टायल बिछ्याईयो
धनकुटा खबर, साउन ३ । पर्यटकहरुलाई पदयात्रा गर्न सहज होस् भन्ने लक्षका साथ जिल्लाको पाख्रीवास नगरपालिका वडा नं ४ स्थितको पर्यटकीय स्थल श्री संसारीमाई पूजा सिमसार क्षेत्रको पदमार्गमा टायल विछ्याईएको छ ।
संसारीमाईपूजा सिमसार क्षेत्र संरक्षण समितिको १ लाख र नगरपालिकावाट प्राप्त ३ लाख ६७ हजार गरी जम्मा ४ लाख ६७ हजार वरावरको लागतमा यो वर्ष करिव १ सय ८५ मिटर पदमार्गमा टायल विच्छ्याईएको हो ।
वर्षभरीको विभिन्न सिजनमा घुमफिर र वनभोजका लागि हजारौको संख्यामा आन्तरिक तथा वाह्य पर्यटकहरुको आउने यो सिमसार क्षेत्रको पदमार्गमा यो वर्ष १ सय ८५ मिटर लम्वाईमा मात्र टायल विछ्याईएको र आगामी दिनमा थप आर्थिक श्रोत जुटाउदै यो कामलाई निरन्तरता दिदै जाने लक्ष समितिको रहेको छ ।
पदमार्गमा टायल विछ्याउन शूरु गरिए सँगै अव यहाँ आउने पर्यटकहरुले सहज रुपमा पदमार्ग यात्रा गर्न पाउने अपेक्षा समेत गरिएको छ ।
यो सिमसार क्षेत्रमा आउने पर्यटकहरुले एकै ठाउँमा सिमसार क्षेत्र,चिया वगान,विभिन्न फलफूलका नर्सरीको दृष्य अवलोकन गरी मनोरञ्जन लिदै आएका छन् ।
