असफल भयो चीनलाई फकाउने मोदीको यस्तो कूटनीति, कामै लागेन जन्मदिनको शुभकामना
काठमाडौं, १० साउन । भुटानको डोक्लाम पठारमा भारत र चीनका बीच एक महिना लामो विवाद शुरु हुनुअघि भारतका प्रधानमन्त्री नरेन्द्र मोदीले चीनका राष्ट्रपति सी चिनफिङ र प्रधानमन्त्री ली खस्याङलाई उनीहरूको जन्मदिनका लाथि सीना वेइबो सामाजिक सञ्जालमा बधाई दिएका थिए ।
तर चीनको रक्षा मन्त्रालयले सोमवार चीनको सुरक्षा स्वार्थका सम्बन्धमा ‘कुनै अवास्तविक भ्रम’ नपाल्नका लागि वक्तव्य जारी गरेपछि मोदीको ‘जन्मदिन कूटनीति’ खासै सफल भएको देखिँदैन ।
सीको जन्मदिन जुन १५ मा थियो र त्यतिखेर मोदीले वेइबोमा उनलाई शुभकामना दिएका थिए । यसैबीच चीनले भारतका राष्ट्रिय सुरक्षा सल्लाहकार अजित डोभल र चिनियाँ स्टेट काउन्सिलर याङ जिएचीका बीच ब्रिक्स मुलुकहरूको बैठकको साइडलाइनमा द्विपक्षीय भेट हुनसक्ने संकेत दिएको छ ।
चिनियाँ विदेश मन्त्रालयका प्रवक्ता लु काङले उनीहरू दुईबीच भेटघाट हुने सम्बन्धमा पुष्टि गर्न नसक्ने बताउँदै ब्रिक्सका राष्ट्रिय सुरक्षा सल्लाहकारहरूले द्विपक्षीय वार्ता गर्ने परम्परा रहेको बताए । यो बैठक साउन १२ र १३ गते बेइजिङमा बस्दैछ । बेइजिङले सीमा विवादका विषयमा कुनै पनि वार्ता गर्नका लागि भारतीय सेना फिर्ता हुनुपर्ने शर्त राखेको छ । एजेन्सी
