मिल्यो कांग्रेसमा भागबण्डा, को को बन्दैछन् मन्त्री ? (सूची सहित)
काठमाडौं, १० साउन । निर्वाचित भएको करिव २ महिनापछि प्रधानमन्त्री शेरबहादुर देउवाले बल्ल मन्त्रिपरिषदलाई पूर्णता दिन लाग्नु भएको छ । कांग्रेसका तर्फबाट मन्त्री हुने १० जनाको नाम टुंगो लागेसँगै मंगलवार बेलुकीसम्म मन्त्रिपरिषद् विस्तार हुन लागेको हो ।
कांग्रेसले देउवा समूहबाट ४, वरिष्ठ नेता रामचन्द्र पौडेल समुहबाट ४, नेता कृष्णप्रसाद सिटौला र खुमबहादुर खड्का समुहबाट १, १ गरी १० जना नयाँ मन्त्री बनाउने भएको हो । यसअघि आफ्नो समुहबाट तीनजनालाई देउवाले मन्त्री बनाइसक्नु भएको छ । कांग्रेसले पार्टी भित्र गुटहरुबीचको भागवण्डाका आधारमा मन्त्री बन्नेहरुको नाम छनौट गरेको हो । कांग्रेसबाट १०, माओवादी केन्द्रबाट ६ र लोकतान्त्रिक फोरमबाट २ समेत गरी मंगलबार १८ मन्त्री थप गर्ने तयारी देउवाले गर्नुभएको छ ।
देउवा समुहबाट मीन विश्वकर्मा, वीरबहादुर बलायर, अर्जुन जोशी, अम्बिका बस्नेत मन्त्री बन्दै हुनुहुन्छ । यस्तै पौडेल समुहबाट बलबहादुर केसी, रामकृष्ण यादव राजन केसी र सरिता प्रसाईं मन्त्री बन्दै हुनुहुन्छ । नेता सिटौलाको भीमसेनदास प्रधान र खुमबहादुर खड्काको समुहबाट मोहनबहादुर बस्नेत मन्त्री बन्दै हुनुहुन्छ ।
माओवादीले यसअघि नै गिरिराजमणि पोखरेल, महेन्द्रबहादुर शाही, आशा खनाल, टेकबहादुर बस्नेत, सीता नेपालीको नाम नयाँ मन्त्रीका लागि तय गरेको थियो । यस्तै फोरम लोकतान्त्रिकले जितेन्द्र देव र गोपाल दहितलाई पठाउने भएको छ ।
