अर्घाखाँचीमा बस दुर्घटना हुँदा २ को मृत्यु, गम्भीर घाइतेलाई हेलिकोप्टरबाट काठमाडौं लगियो
अर्घाखाँची, असोज २० । अर्घाखाँचीको डाँडाकटेरीदेखि बुटवल जाँदै गरेको एक यात्रीबहाक बस शुक्रबार अर्घाखाँचीको मालारानी गाउँपालिका वडा नम्बर–३ सापडाँडामा दुर्घटना हुँदा दुईजनाको मृत्यु भएको छ ।
मृत्यु हुनेमा मालारानी–३ का ९ वर्षीय अभियान आचार्य र गुल्मी, धुरकोट–१ की ३५ वर्षीया सुन्तली विक छन् ।
लु१ख ७५१८ नम्बरको बस दुर्घटनामा करिब ४० जना घाइते भएका छन् । घाइतेमध्ये १० जनाको अवस्था गम्भीर रहेको प्रहरीले जनाएको छ ।
गम्भीर घाइतेहरुलाई नेपाली सेनाको हेलिकोप्टरबाट उपचारका लागि काठमाडौं लगिएको छ । सामान्य घाइते ३५ जनालाई उपचारका लागि बुटवल पठाइएको छ ।
गाडी चालक गोकुल विक भने सकुशल रहेका छन् । ३५ सिट क्षमताको बसमा ७० जना यात्री सवार रहेको जनाइएको छ ।
बसमा सवार केही यात्री सकुशल छन् भने केहीको अर्घाखाँची जिल्ला अस्पतालमा उपचार भइरहेको छ ।
गाडी सडकबाट करिब १०० मिटर तल खसेको थियो ।
– अर्जुन भुसाल / इमेज
