देउवा प्रधानमन्त्री भएपछि कांग्रेसको आन्तरिक सन्तुलन फेरिने, निधिलाई कांग्रेस कार्यवाहक सभापति बनाईने
काठमाडौं, २३ जेठ–पार्टी सभापति शेररबहादुर देउवा प्रधानमन्त्री भएपछि कांग्रेसको आन्तरिक सन्तुलन फेरिने भएको छ । यसअघिको प्रतिवद्धता बमोजिम देउवाले बिमलेन्द्र निधिलाई पार्टीको उपसभापति मनोनित गर्नेछन् ।
निधिलाई कार्यबाहक सभापति समेतको जिम्मेवारी दिने देउवाको तयारी रहेको उनी निकट स्रोतले वतायो । पार्टीमा मुल्य मान्यताको राजनीति गर्ने ठानिएका रामचन्द्र पौडेललाई हावी हुन नदिन देउवाले आफूपछिको उत्तराधिकारी निधिलाई बनाउन लागेको चक्रपथमा खबर छापिएको छ ।
देउवाले आफू प्रधानमन्त्री भएपछि कार्यवाहक सभापतिको समेत जिम्मेवारी दिने आश्वासन दिएपछि पुष्पकमल दाहाल नेतृत्वको सरकारबाट राजीनामा दिए पनि निधिले पछि राजीनामा फिर्ता गरेका थिए । कांग्रेस–माओवादी गठबन्धन बनाउन निकै ठूलो भूमिका खेलेका निधिलाई आफूपछिको वरियतामा अघि सार्दा खुमबहादुर खड्का, कृष्णप्रसाद सिटौला लगायतका नेताहरु चिढिने भए पनि देउवाले निधिलाई उपसभापति बनाएरै छोड्ने योजना बनाएका छन् । कांग्रेसमा निधिलाई नेतृत्वमा स्थापित गर्ने तयारी देउवाले गरेपछि वरिष्ठ नेता रामचन्द्र पौडेलले भने खिन्नता महसुस गरेका छन् ।
आफू प्रधानमन्त्री भएपछि संसदीय दलको नेतामा पौडेललाई ल्याउने आश्वासन देउवाले दिए पनि त्यो भने पूरा हुने देखिएको छैन । संसदीय दलको नेता नै प्रधानमन्त्री हुने भएकाले आफू प्रधानमन्त्री भएपछि दलको नेता परिवर्तन गर्न नैतिक नहुने तर्क देउवाले अघि सार्ने देखिएको छ ।
