धनकुटामा फोटो सहितको मतदाता नामावलीमा नाम दर्ता गराउने कार्य शुरु, पहिलो दिन ७२ जनाले नाम दर्ता गराए
धनकुटा खबर, २ साउन । धनकुटामा फोटो सहितको मतदाता नामावलीमा नाम दर्ता गराउने कार्य शुरु भएको छ । उमेर पुगेर पनि मतदाता नामावलीमा नाम छुटेका व्यक्तिहरुका लागी जिल्ला निर्वाचन कार्यालय धनकुटामा नाम दर्ता गराउने कार्य शुरु भएको हो ।
उमेर पुगेर पनि मतदाता नामावलीमा नाम लेख्न छुटेका कारण स्थानीय तहको निर्वाचनमा मतदान गर्न नपाएका नागरिकका लागी आईतवार देखि जिल्ला निर्वाचन कार्यालय धनकुटामा नाम दर्ता गराउन थालिएको छ ।
मतदाता नामावलीमा नाम लेखाएपछि प्रादेशिक र संसदीय निर्वाचनमा मतदान गर्न पाउने छन । जिल्ला निर्वाचन कार्यालय धनकुटाले दिएको जानकारी अनुसार आईतवार पहिलो दिन ७२ जनाले नाम दर्ता गराएका छन् । मतदाता नामावलीमा नाम नभएका व्यक्तिहरु नाम दर्ता गराउन उत्साहित देखिएको जिल्ला निर्वाचन कार्यालय धनकुटाका नायव सुव्वा एवं सुचना अधिकारी केशव पौडेलले वताउनुभयो ।
जिल्ला निर्वाचन कार्यालय धनकुटामा आगामि साउन १५ गते सम्म फोटोसहितको मतदाता नामावलीमा नाम दर्ता गराउन सकिने निर्वाचन कार्यालय धनकुटाले जनाएको छ । धनकुटा सहित देशभर आईतवार देखि फोटो सहितको मतदाता नामावलीमा नाम दर्ता गराउने कार्य शुरु भएको छ ।
