धनकुटामा अलैची र चियाको बिकासको लागि मञ्च गठन, के काम गर्ने छ यो मञ्चले ?
धनकुटा खबर, साउन १९ । अर्थोडक्स चिया र अलैचीको क्षेत्रमा देखिएका समस्या समधानका लागि पैरवी तथा वकालत गर्ने उदेश्यले धनकुटामा सार्वजनिक नीजि साझेदारी सन्जाल मन्च (पिपिपि नेटवर्किङ्ग) गठन भएको छ ।
उन्नती परियोजना अन्तर्गत अन्तराष्ट्रिय श्रम संगठन (आइएलओ) को आर्थिक सहयोगमा बिश्व परिदृष्य वकालत मञ्च (वल्ड भिजन एडभोकेसी फोरम) को संयोजनमा उक्त सन्जाल मञ्च गठन गरिएको हो ।
कृषक, ब्यपारी, श्रमिक संगठन, सम्बन्धित सरकारी निकाय, गैर सरकारी संस्था, सन्चारकर्मी तथा सरोकारबाला निकाय आवद्ध उक्त मञ्चको समितिको संयोजकमा अलैची ब्यवशायी लाखमान घिसिङ्ग र सदस्य सचिवमा चिया कृषक नारायण तामाङ्ग रहनेगरी २५ सदस्यीय समिति रहेको छ ।
यो मञ्चले चिया, अलैची, अदुवा र दुग्ध ब्यबसायको क्षेत्रको लगानी, ब्यपार, अबरोध, अस्थिरता तथा सिमाहरुको न्यूनिकरणका लागि सम्बन्धित सरोकारवालाहरुलाई सल्लाह र सुझाव दिने साझा थलोको रुपमा रहने परियोजनका संयोजक किरण भट्टले जानकारी दिनुभयो ।
मञ्चले उक्त क्षेत्रका श्रमिकका अधिकार, बाल श्रमिक, असमान ज्याला, वातावरणिय प्रभाव, र सामाजिक उत्तरदायित्व जस्ता बिषयमा देखिएका समस्यालाई सामुहिक रुपमा समधानका लागि नीति निर्माण तह सम्म पहल गर्ने भट्टले जानकारी दिनुभयो ।
त्यस्तै उक्त मन्चले सरकारी ऐन र कार्यक्रमहरुका सम्बन्धमा आवश्यक देखिएका कुराहरुमा घरेलु , साना तथा मझौला उद्यामीहरु र सरोकारवालाहरुको बीचमा सूचनाको आदानप्रदान तथा जानकारी गराउने विश्व परिदृश्य वकालत मञ्चका सन्चार अधिकृत लोकेन्द्र भट्टले जानकारी दिनुभयो ।
उन्नती परियोजना अन्तर्गतका पूर्वी पहाडका ७ जिल्लाहरुमा गठन हुने उक्त मञ्च हाल सम्म भोजपुर, संखुवासभा र तेह्रथुम जिल्लामा गठन भईसकेको संस्थाले जानकारी दिएको छ ।
