संविधान संशोधन विधेयक फेल भएसँगै राजपाले उठायो नसोचेको कदम, संसद छाड्ने मिति तोकियो
काठमाडौं । संविधान संशोधन विधेयक संसदबाट अस्वीकृत भएसँगै राष्ट्रिय जनता पार्टी नेपालले व्यवस्थापिका संसद छाड्ने भएको छ । यसबारे औपचारिक निर्णय हुन बाँकी छ ।
तर, स्रोतले बताएअनुसार राजपाका २५ सांसदले भदौ ७ गते पर्सी संसद सदस्यबाट सामूहिक राजीनामा दिनेछन् । यसको निर्णय भोलि बस्ने राजपाको अध्यक्ष मण्डल बैठकले गर्ने स्रोतको दाबी छ ।
जुन एजेण्डामा राजनीति गरेको त्यो नै फेल भएपछि संसदमा बस्नुको औचित्य नरहेको भन्दै राजपाका सांसद राजीनामा दिएर संसद छाड्ने निष्कर्षमा पुगेको बताइन्छ ।
आज भएको मतदानमा बहुमत नपुग्दा विधेयक संसदमा अस्वीकृत भएको थियो ।
यस्तै, राजपाले आगामी असोज २ गते हुने तेस्रो चरणको चुनावमा भाग नलिने घोषणा गरेको छ । मधेसका माग पूरा गर्ने अन्तिम विकल्प संविधान संशोधन विधेयक नै असफल भएको भन्दै माग पूरा नभएसम्म चुनाव बहिष्कार गर्ने निष्कर्षमा पुगेको स्रोतले जनाएको छ । नेपाल पानाबाट ।
