आचारसंहिता : एमालेलाई टोपी लगाउन प्रतिबन्ध, माओवादीलाई ग्यास सिलिण्डर बाँड्न छुट
काठमाडौं, १६ भदौ । जनकपुरमा भएको एमाले मोर्चा संगठनको भेलामा एमाले वरिष्ठ नेता तथा पूर्व प्रधानमन्त्री माधवकुमार नेपालले सूर्य चिन्ह अंकित टोपी लगाएको भन्दै निर्वाचन आयोगले नेपालमाथि २४ घन्टे स्पष्टिकरण सोध्यो । आयोगले औपचारिक रुपमै पत्र काटेर एमाले वरिष्ठ नेता नेपालमाथि निर्वाचन आचार संहिता उल्लंघन गरेको आरोप लगायो ।
एमाले वरिष्ठ नेता नेपालले सम्बोधन गरेको त्यही भेलामा बाहिरबाट ढुंगामुढा गर्ने राजपालाई भने आयोगले अहिलेसम्म एउटा पत्रसमेत काटेको छैन । प्रमुख निर्वाचन आयुक्त अयोधीप्रसाद यादवसँग एक अनलाइन न्युज पोर्टलले लिएको अन्तरवार्तामा उहाँले मौखिक रुपमा त्यस घटनाप्रति आयोगको चासो भएको अनौपचारिक अभिब्यक्ति त दिनुभयो तर, एउटा टोपी लगाएको विषयमा एमालेमाथि यसरी २४ घन्टे पत्र काट्ने आयोगले दलको शान्तिपूर्ण कार्यक्रममा ढुंगामुढा गर्ने जस्तो हिंस्रह र आचार संहिता विरोधी अपराधमा औपचारिक रुपमा मुख खोलेको छैन ।
यही टोपी देखाएर आयोगले २४ घन्टे पत्र काटेको थियो
सञ्चार माध्यमले अन्तरवार्ताका क्रममा प्रश्न सोध्दा प्रतिक्रिया दिनु बाहेक एमाले कार्यक्रममाथि भएको ढुंगामुढामा आयोगले कुनै औपचारिक कारवाही अगाडि बढाएको छैन । हुन त भरतपुरमा मतपत्र च्यात्नेको माग बमोजिम नै फेरि चुनाव गराएको आयोगका प्रमुख आयुक्त यादवले भरतपुर सम्झेर चित्त नदुखाउन एमाले नेताहरुलाई आग्रह गर्नु भएको छ । यो जवाफका लागि जवाफ त होला, तर यसले न्यायिक औचित्य पुष्टि गर्न सकेको छैन र सक्नेछैन पनि ।
माधव नेपालले धनुषामा टोपी लगाएकोप्रति आपत्ती जनाउँदै आयोगले २४ घन्टे पत्र काटेको भोलिपल्टै माओवादी अध्यक्ष पुष्पकमल दाहालले रौतहटमा मतदातालाई १००० वटा ग्यास सिलिण्डर र चुल्होसमेत बाँड्न भ्याउनु भयो । कार्यकर्ता भेलामा चुनाव चिन्ह अंकित टोपी लगाउनु आचार संहिता विपरित भएको भन्दै पत्र काट्ने आयोगले मतदातालाई ग्यास सहितका सिलिण्डर र चुल्हो बाँड्नुलाई आचार संहिता उल्लंघन मान्छ कि मान्दैन ? निश्पक्ष रहनुपर्ने निर्वाचन आयोगको भूमिकामाथि अघिल्लै चरणका चुनावमा प्रश्न उठेको थियो ।
माधव नेपालको टोपी र पुष्पकमल दाहालको ग्यास सिलिण्डर प्रकरणले आयोगको निश्पक्ष भूमिकामाथि थप प्रश्न उठाइदिएको छ ।
रौतहटमा ग्यास र चुल्हो बाँड्दै दाहाल
बिहीवार रौतहटमा चुनावी अभियान लिएर पुग्नु भएका दाहालले बाढी पीडितका लागि सरकारबाट सहुलियत मिलाइदिने आश्वासन दिंदै एक हजार थान ग्यास सिलिण्डर र चुल्हो वितरण गर्नु भएको थियो । – चक्रपथ अन्लाईनबाट ।
