अध्यक्ष प्रचण्डले के गरे त्यस्तो जसका कारण प्रचण्डको हात काट्ने धम्की सहित सडकमा उत्रियो फोरम ?
संघीय समाजवादी फोरम नेपालले माओवादी केन्द्रका अध्यक्ष पुष्पकमल दाहाल प्रचण्डविरुद्ध मंगलबार वीरगन्जमा प्रदर्शन गरेको छ ।
प्रचण्डले पर्साको ठोरीलाई प्रदेश नम्बर–३ मा गाच्ने अभिव्यक्ति दिएको भन्दै विरोधमा संघीय फोरमले प्रदर्शन गरेको हो । चितवन–३ बाट प्रतिनिधिसभा सदस्य निर्वाचित प्रचण्डले ठोरीमा मंगलबार भएको सभालाई सम्बोधन गर्दै माडीसँगै जोडिएको विकट ठोरीलाई प्रशासनिक सुगमतालाई मध्यनजर गर्दै प्रदेश–३ मा गाभ्न सकिने विचार व्यक्त गरेका थिए ।
भारतसँग सीमा जोडिएको ठोरी पर्सा जिल्लामा पर्ने भए पनि चितवन भएर जानुपर्छ । विरोधपघि घण्टाघर चोकमा भएको सभालाई सम्बोधन गर्दै फोरमका पर्सा उपाध्यक्ष सुन्दर कुर्मीले ठोरीलाई प्रदेश–२ बाट अलग गरेर ३ मा गाभ्ने अभिव्यक्ति दिनेको हाट काटिदिने धम्की दिए ।
उनले ठोरीलाई प्रदेश तीनमा भाग्ने अभिव्यक्तिले प्रचण्ड मधेसविरोधी प्रमाणित गरेको आरोप लगाए । प्रचण्डले अभिव्यक्ति नसच्याए माओवादी कार्यकर्तालाई भोलि (बुधबार)देखि वीरगन्जको भूमिका टेक्न नदिने चेतावनीसमेत दिए । तर, ठोरीकै जनता भने विगत लामो समयदेखि चितवनमा गाभिनुपर्ने माग गर्दै आन्दोलनमा छन् । साविकको ठोरी, निर्मलवस्ती र सुर्वणपुर गाविस मिलाएर हाल ठोरी गाउँपालिका बनेको छ ।
