प्रदेश नम्बर १ को माओबादी केन्द्र मा भाँडभैलो, किराती माथि सबैको आक्रोश, प्रचण्डको उपस्थितिमा बैठक बोलाउन माग
मोरङ । माओवादी केन्द्रको प्रदेश नम्बर १ भित्रको विवादले उग्र रुप लिएको छ । पार्टीका २९ पोलिटब्यूरो सदस्य र तीन केन्द्रीय सचिवालय सदस्यले अध्यक्ष पुष्पकमल दाहाल प्रचण्ड कै उपस्थितिमा तत्काल प्रदेश सचिवालय बैठक बोलाउन माग गर्दै आएका छन ।
यसअघि माघ २५ र २६ गते बस्ने भनिएको प्रदेश सचिवालयको बैठक स्थगित भएको छ । बैठक स्थगन गर्ने निर्णय भएपछि उक्त कार्य शंकास्पद भएको भन्दै उनीहरूले तत्काल बैठक राख्न माग गर्दै प्रदेश संयोजक, सावित्रीकुमार काफ्लेलाई उनीहरुले पत्र नै बुझाएका छन । ‘पार्टी सञ्चालनको विधि, पार्टीभित्र देखिएको चरम अवसरवाद र अराजकतावाद एवं समग्र विषयमाथि गम्भीर समीक्षा गरेर संसदीय दल र प्रदेश सरकारमा प्रतिनिधित्व गराउने सन्दर्भमा महत्वपूर्ण निर्णय लिनुपर्ने भएकाले अध्यक्ष कमरेड प्रचण्डको उपस्थितिमा बैठक राख्न प्रदेश संयोजक समक्ष जोडदार माग गर्दछौं । पत्रमा उल्लेख गरिएको छ ।
माओवादी केन्द्र र एमाले प्रतिनिधिसभा र प्रदेशसभा निर्वाचनमा वाम गठबन्धनको नाममा भाग लिएपछि माओवादी नेता गोपाल किरातीले त्यसैको विरोध गरेका थिए । त्यसपछि निश्कृय बनेका किराती पछिल्लो समय पार्टीको निर्णयविरुद्ध उत्रिएपछि उनलाई कारबाही गर्न माग गर्दै १९ जना पोलिटब्युरो सदस्यले अध्यक्ष प्रचण्डलाई उजुरी पठाईसकेका छन । माओवादी पार्टी पुनर्गठन गर्ने घोषणा गर्दै आएका नेता किरातीले पछिल्लो समयमा पार्टीको प्रदेश इन्चार्ज आफू भएको भन्दै निर्णय प्रक्रियामा सामेल भएका छन् । उनकै सक्रियतामा प्रदेश सचिवलायको बैठक स्थगित भएको बुझिएको छ ।
यसरी बैठकको माग गर्नेहरुमा पेशल खतिवडा, हेमराज भण्डारी, श्रीप्रसाद जबेगु, तिलकबहादुर थापा, धर्मशिला चापागाईं, होमकुमारी खापुङ, शंकर राई, झलकसिंह दर्लामी, मुक्साहाङ मेन्याङ्बो, अस्मिता कार्की, शिवबहादुर बस्नेत, हर्क नेम्बाङ, बाबुराम गौतम र गोपी आछामी ,रामकुमारी चौधरी, दुर्गाप्रसाद चापागाईं, सुदन किराती, राजु आचार्य, गणेश उप्रेती, डम्बर सुवेदी, दुर्गाजयन्ती राई, खेम सुन्दास, रिपु राई, मोहनबहादुर खत्री, हेम कार्की र योगेन्द्र मण्डलको नाम उल्लेख छ ।
यसैगरी पार्टीका सचिवालय सदस्य टंक आङबुहाङ, पूर्वमन्त्री एवं मोरङ ५ का सांसद शिवकुमार मण्डल र पूर्वसांसद पासाङ शेर्पाले समेत स्थगित बैठक बोलाउन माग गरेका छन । यो सँगै माओबादी केन्द्रको प्रदेश नम्बर १ मा भाँडभैलो शुरु भएको पूर्वेली न्यूजमा खबर छ ।
