यसरी गरियो धनकुटामा फोहरमैला ब्यबस्थापन – भिडियो सहित
धनकुटा खबर । धनकुटा नगरपालिकाले फोहरमैला ब्यबस्थापनका लागि नमुना फोहरमैला ब्यवस्थापन केन्द्रको स्थापना गरेको छ । यो फोहरमैला व्यवस्थापन केन्द्रको स्थापनासगै नगरमा जतातै देखिने फोहर व्यवस्थापन भएको छ ।
फोहर मैला व्यबस्थापन केन्द्रमा थुप्रिएको फोहरको थुप्रो माथिनै फूलवारी सहितको सुन्दर पार्क समेत निर्माण गरिएको छ । धनकुटा नगरपालिकाले वडानम्वर ६को सल्लेरीमा संचालनमा ल्याएको फोहर ब्यबस्थापन केन्द्र वरिपरि बाढी र भूक्षयले पारेका ठूल्ठूला खाल्डा पुरेर चिटिक्क परेको पुष्प वाटिका तयार पारेपछि यो ठाउँ फोहरमैला ब्यबस्थापनका लागि सिकाईको थलो बनेको छ ।
धनकुटा नगरपालिकाले फोहरलाइ पुरेर बनाएको पुष्प वाटिका र नगरले गरेको नमुना फोहर व्यबस्थापन हेर्न र जान्न यो आर्थिक बर्ष भित्रमात्रै दर्जन बढि नगरपालिका तथा गाउपालिकाको टोली भ्रमणमा आइसकेका छन् ।
सफा शहर अभियानलाई सार्थक बनाउन धनकुटा नगरपालिकाले घरभीत्रको फोहर न्यूनिकरणका लागि घरैपिच्छे गड्यौला पालन, बायोग्यास र मानव मलमुत्र संकलन गरि कम्पोष्ट मल बनाउने कामलाई प्रोत्साहन गरेको धनकुटा नगरपालिकाका वातावरण शाखा प्रमुख उपेन्द्र खनालले बताउनुभयो ।
धनकुटा सदरमुकाम र हिलेबाट मात्रै दैनिक १४ टन भन्दा बढि फोहर उत्पादन हुन्छ भने नकुहिने फोहोर ७ टन मात्रै फोहोरमैला संकलन केन्द्रमा जम्मा हुने नगरपालिकाले जनाएको छ ।
