धनकुटाका किसानले पाए ७१ थान मिनी टिलर !, दुई हजार घरधुरी लाभान्वित
धनकुटा खबर । कृषिको उत्पादकत्व क्षमता वृद्धि गर्ने उद्देश्य सहित प्रधानमन्त्री कृषि आधुनिकीकरण परियोजना कार्यान्वयन इकाइ धनकुटाले किसानलाई ७१ थान मिनी टिलर (हाते ट्याक्टर) वितरण गरेको छ ।
सो परियोजनाको कार्यक्षेत्र अन्र्तगत पर्ने महालक्ष्मी नगरपालिकाको वडा नं. ८ र ९ र छथरजोरपार्टी गाउँपालिकाको वडा नं. २, ३, ५ र ७ का ३२ ओटा कृषक समुहलाई मिनी टिलर (हाते ट्याक्टर) वितरण गरिएको परियोजना जोन कार्यान्वयन इकाइका प्रमुख हर्षहाङ राईले बताए ।
मिनी टिलरवाट सो क्षेत्रमा व्यवसायिक तरकारी खेती गर्दै आइरहेका २ हजार घरधुरी कृषक लाभान्वित हुने उनले बताए । ५० प्रतिशत अनुदानमा किसानलाई वितरण गरिएको मिनी टिलर ९ हस पावर क्षमताको १८ थान र ७ हस पावर क्षमताको ३१ थान रहेको छ ।
९ हस पावर क्षमताको बजार मुल्य ५५ हजार र ७ हस पावर क्षमताको बजार मुल्य ३२ हजार ५ सय मुल्य पर्छ । जोन अन्र्तगतको कार्यक्षेत्रमा २०५० साल देखि व्यवसायिक रुपमा तरकारी खेती हुँदै आइरहेको छ ।
