छथरजोरपाटीस्थित ४ सय बर्ष पुरानो महादेवको मन्दिर संरक्षणको पर्खाइमा !
धनकुटा खबर । हाल सम्म निर्माण भएको एकिन तिथी फेला पर्न नसकेको धनकुटा जिल्लाको छथरजोरपाटी गाउँपालिकाको तिलेश्वरमा रहेको महादेवको मन्दिर संरक्षण अभावमा जिर्ण बन्दै गएको छ ।
करिव चार सय बर्ष पहिला निर्माण भएको अनुमान गरिएको यो मन्दिरमा लगाईएका ईटा कालोमासको कालिमाटी मिसाएर बनाएको भन्ने विश्वास गरिएको स्थानिय गोपालप्रसाद अधिकारीले जानकारी दिए ।
राणा साशनको समयमै त्यस मन्दिरमा चण्डी, रुद्रि, श्राद्ध, विवाह, आदि पढाईने व्यावस्था गरिएको स्थानिय बुढापाकाको भनाई छ । राणा शासनको अन्त्य भए संगै वि.स २००८ सालमा त्यसै ठाउँमा प्राथमिक विद्यालय स्थापना भएको थियो अहिले त्यो विद्यालय माध्यामिक विद्यालय भई सकेको छ ।
मन्दिर वरपरको लगाईएको पर्खाल भत्किसकेको छ भने मन्दिरमा रङ-रोगन भएको छैन विभिन्न समयमा आएका भूकम्पले समेत मन्दिर चर्किएको छ । विद्यालयसंगै भएकोले मन्दिरको वरपर तारबार भने गरिएको छ ।
दुई तर्फ सामान्य टिनको छाना लगाईएको छ । ऐतिहासिक सम्पदा भए पनि यसको यथोचित संरक्षण नहुनु दुःखद भएको अधिकारी बताउछन् ।
