प्रहरीले धनीलाई फर्कायो भेटाएको पैसा
खोटाङ, ३१ भदौ । खोटाङमा प्रहरीको गस्ती टोलीले भेटेको पैसा सम्बन्धित व्यक्तिलाई फिर्ता गरेको छ ।
गस्ती गर्नेक्रममा ईलाका प्रहरी कार्यालय महादेवस्थान हलेसीबाट खटिएको प्रहरी टोलीले सडकमा फेला पारेको २ हजार ३४५ रुपैयाँ सम्बन्धित व्यक्ति हलेसीकै उचितबहादुर राईलाई फिर्ता गरेको हो ।
हलेसी तुवाचुङ नगरपालिका–७ महादेवस्थानमा गस्तीमा निस्किएका प्रहरी जवान डिकबहादुर कार्कीले बिहीबार भेट्टाएको पैसा केही समयपछि सम्बन्धित व्यक्तिलाई खोजेर फिर्ता दिएको इलाका प्रहरी कार्यालय हलेसीका प्रहरी निरीक्षक प्रमोद कार्कीले जानकारी दिए ।
हराएको पैसाका विषयमा इलाका प्रहरी कार्यालयमा फोन आएको र उचितबहादुरले भनेअनुसारकै नोट पाइएकाले फिर्ता दिइएको प्रहरीले जनाएको छ ।
उचितबहादुरले पानीको शुल्क वापत उठाइएको रकम हराएको बताएका छन् । -न्यूज कारखाना
