लाललिगुराँस भयो कर्मचारी फुटबलको बिजेता
नारायण कुमार राई, धनकुटा । धनकुटामा जारी अन्तर पालिका स्तरीय कर्मचारी फुटवल प्रतियोगिताको उपाधी छिमेकी तेह्रथुम जिल्लाको लालिगुराँस नगरपालिका बसन्तपुरले जितेको छ । १० गतेबाट ३ दिन सम्म सन्चालन भएको खेलमा तेह्रथुमकै छथर गाउँपालिकालाई ० का बिरुद्ध ४ गालले हराउँदै लालिगुराँसले उपाधी जितेको हो ।
छथरजोरपाटी गाउँपालिका कर्मचारी समुहको आयोजनामा सम्पन्न खेलमा फाईनलका लागि लालिगुराँसले चौबिसे गाउँपालिका र छथरले आयोजक पालिकालाई हराएको थियो । जित संगै बिजेता लालिगुराँसले नगद ३५ हजार ५ सय ५५ ट्रफी र उप–बिजेता छथरले नगद २१ हजार १ सय ११ जितेको छ ।
बिजेता र उप–बिजेता टोलीलाई आयोजक पालिकाका अध्यक्ष शेरबहादुर लिम्बू,प्रमुख प्रशासकीय अधिकृत तुलराज थापा मगर र आयोजक समुहका संयोजक दिवश पौडेलले पुरस्कार प्रदान गर्नुभएको थियो ।
पालिकाको सिंधुवामा खेलमैदानमा सम्पन्न खेलमा धनकुटा र तेह्रथुमका १५ वटा कर्मचारी फुटबल टोलीको सहभागिता रहेको पालिकाका स्वास्थ्य शाखा प्रमुख सुन्दरमान डंगोलले जानकारी दिनुभयो ।
