म्याङलुङले राजनीतिक आस्थाको आधारमा कर्मचारी आतंकित बनाएको आराेप
तेह्रथुम, २८ भदौ । नेपाल निजामती कर्मचारी युनियन तेह्रथुमले म्याङलुङ नगरपालिकाले राजनीतिक आस्थाको आधारमा आतंकित बनाएको भन्दै ध्यानाकर्षण भएको जनाएको छ ।
निजामती कर्मचारीहरू सरकारले विधिसम्मत तरिकाले खटाएको स्थानमा गई काम गर्न तयार भए पनि स्थानीय सरकार आफैं प्रक्रिया अवरुद्ध गर्ने र कर्मचारीहरू सुविधाभोगी छन्, खटाएको स्थानमा गएनन् काम गरेनन् भनेर भ्रामक प्रचार गरी कर्मचारीप्रति जनताको नजरमा नकरात्मक सन्देश दिन खोजिएको भन्दै ध्यानाकर्षण गरेको जनाएको छ ।
निःस्वार्थ, कर्मठ र कर्तब्यनिष्ठ कर्मचारीहरूमाथि म्याङलुङ नगरपालिकाले बिना कारण राजनीतिक आस्थाको आधारमा कर्मचारीको मनोबल गिराउने, निराश, हतोत्साहित र आतंकित बनाई क्षणिक एवं निहित स्वार्थ पूरा गर्न बिना माग छानीछानी दु:ख दिएको युनियनका अध्यक्ष सन्देश नेपालले जारी गरेकाे विज्ञप्तिमा जनाइएको छ ।
नगरपालिकाका कतिपय शाखामा वर्षौंदेखि एउटै कर्मचारी राखी आर्थिक चलखेल गर्ने जस्ता क्रियाकलाप भएको भन्दै युनियनले गम्भीर ध्यानाकर्षण भएको जनाएको छ ।
