मोरङको कानेपोखरीबाट ६.३८ ग्राम ब्राउन सुगर सहित एक युवक पक्राउ
मोरङ — मोरङको कानेपोखरी गाउँपालिका–२ देउलिया खोलाबाट प्रहरीले ६ ग्राम ३८० मिलिग्राम ब्राउन सुगरसहित एक युवकलाई पक्राउ गरेको छ।
शनिबार राति करिब १०:३० बजे रंगेलीबाट कानेपोखरीतर्फ आउँदै गरेको प्र.१-०२-०४४ प.११८ नम्बरको मोटरसाइकललाई प्रहरी चौकी रमाइलोबाट खटिएको टोलीले शङ्काका आधारमा जाँच गरेको थियो।
जाँचका क्रममा मोटरसाइकल चालक बेलबारी नगरपालिका–११ निवासी २९ वर्षीय रणध्वज राईको साथबाट ब्राउन सुगर जस्तो देखिने ६ ग्राम ३८० मिलिग्राम लागूऔषध फेला परेपछि प्रहरीले उनलाई नियन्त्रणमा लिएको हो।
पक्राउ परेका राईलाई इलाका प्रहरी कार्यालय पथरीमा राखी लागूऔषध सम्बन्धी कसुरमा थप अनुसन्धान भइरहेको प्रहरीले जनाएको छ।
