दक्षिण एशियाली क्षेत्रका पत्रकारिताका चुनौतीबारे सम्मेलन
आगरा (भारत), ५ जेठ (रासस) : दक्षिण एशियाली मुलुकबीच आपसी सद्भाव र सहकार्य वृद्धि गरी साझा समृद्धि हासिल गर्नुपर्ने निचोडसहित ‘इन्डो–नेपाल–बङ्गलादेश मिडिया कन्क्लेभ–२०२३’ सम्पन्न भएको छ । सम्मेलनको मुख्य विषयवस्तु ‘समसामयिक परिदृष्यमा मिडियाका चुनौती र समाधान’ रहेको थियो ।
भारतस्थित प्रेस क्लब अफ, आगरा र उत्तर प्रदेश पत्रकार सङ्घको आयोजना तथा सार्क जर्नालिष्टस फोरमको सहयोगमा आयोजित कार्यक्रममा नेपालका २५, बङ्गलादेशका १२ र भारतका करिब तीन सय पत्रकार सहभागी थिए । भारतका केन्द्रीय कानुन राज्यमन्त्री प्रा एसपी सिंह बघेलले उद्घाटन गर्नुभएको सम्मेलनमा भर्चुअलरूपमा सम्बोधन गर्दै उत्तर प्रदेशका उपमुख्यमन्त्री ब्रजेश पाठकले पत्रकारिता लोकतन्त्रको चौथो स्तम्भ भएको उल्लेख गर्दै सत्ता र पत्रकारिताबीचको खाडल हटाएर लोकतन्त्र बलियो बनाउनुपर्नेमा जोड दिनुभयो ।
राज्यमन्त्री बघेलले प्रतिस्पर्धा र टिआरपीका नाममा कतिपय समाचार आधा अपूर्ण वा तथ्यविहीन प्रसारण र प्रकाशन हुने गरेकाले त्यसले गलत असर पर्ने बताउनुभयो । उहाँले प्रजातन्त्रका चार खम्बामध्ये एउटा पनि कमजोर भए लोकतन्त्र खतरामा पर्नेसमेत उहाँले बताउँदै त्यसैले पत्रकारले महाभारतका नारदले झैँ पारदर्शिताका साथ आफ्नो कर्तव्य निर्वाह गर्न आग्रह गर्नुभयो । उत्तर प्रदेश राज्यका उच्च शिक्षामन्त्री योगेन्द्र उपाध्यायले सरकार र पत्रकारले समाजको लागि सोच्दा मात्रै समस्याको समाधान हुने बताउनुभयो ।
कार्यक्रमका प्रमुख वक्ता वरिष्ठ पत्रकार विनोद अग्निहोत्रीले आगरामा भएको भारत–पाक शिखर सम्मेलनको स्मरण गर्दै ती वार्ता सफल भएको भए अहिलेसम्म भारत र पाकिस्तानको नक्सा परिवर्तन भइसकेको हुने जनाउनुभयो । सङ्घका प्रदेश अध्यक्ष शिव मनोहर पाण्डेले ग्रामीण क्षेत्रका पत्रकारलाई कसैले ध्यान नदिएको जनाउँदै मिडियामाथि अङ्कुश लगाउन नहुने बताउनुभयो ।
सार्क जर्नालिष्ट फोरमका अध्यक्ष राजु लामाले दक्षिण एशियामा भारतमा पनि पत्रकारले लोकतन्त्रको रक्षाका लागि सधैँ अग्रपङ्क्तिमा लडेको जनाउँदै अफगानिस्तानका पत्रकारले भोग्नुपरेका समस्याबारे ऐक्यबद्धता जनाउन आग्रह गर्नुभयो । सोही मञ्चका महासचिव बङ्गलादेशका मोहम्मद अब्दुर रहमानले भारतको लोकतन्त्र समृद्ध र प्रेरणादायी भएकाले यसबाट अरू मुलुकले शिक्षा लिनुपर्ने बताउनुभयो ।
क्लबका अध्यक्ष अशोक अग्निहोत्री, वरिष्ठ पत्रकार विनोद भारद्वाज, आदर्श नन्दन गुप्ता, जसवीर सिंह जस्सी, शिव चौहान, सञ्जय सिंह, रिङ्की तोमर, अजेन्द्र चौहान, अरुण रावत, मनिष जैन, विजय बघेल, समीर कुरेशी, कपिल अग्रवालगायत पनि सहभागी हुनुभएको थियो । वरिष्ठ पत्रकार अरुण त्रिपाठीले पत्रकार र पत्रकारिताको सङ्कटबारे प्रस्तुतीकरण गर्नुभएको सम्मेलनमा क्लबका उपाध्यक्ष विनीत दुबे, उपसचिव शोभित चतुर्वेदी र प्रेस क्लब अफ आगराका सचिव सञ्जय तिवारी, कोषाध्यक्ष विवेक जैनलगायत सहभागी हुनुहुन्थ्यो ।
–––
