दीपेन्द्रको औसत प्रदर्शन, मोन्ट्रियल टाइगर्सको पहिलो हार
काठमाडौं । नेपाली क्रिकेटेर दीपेन्द्र सिंह ऐरी सम्मिलिति मोन्ट्रियल टाइगर्सले ग्लोबल टी२० क्यानडा क्रिकेट लिगमा पहिलो हार बेहोरेको छ ।
दीपेन्द्रले औसत प्रदर्शन गरेको खेलमा मोन्ट्रियल टाएगर्स ब्राम्पटन वल्भससँग १५ रनले पराजित भयो । खेलमा दीपेन्द्रले २८ रन बनाएका थिए र टिमका लागि यो शकिब अल हशनसँगै व्यक्तिगत उच्च स्कोर रह्यो ।
लगातार तीन खेल जितेको मोन्ट्रियलको यो पहिलो हार हो ।
ब्राम्पटनका कोलिन डे ग्रान्डहोम र लोगा भान बिकले उत्कृष्ट बलिङ गरेपछि १४४ रनको लक्ष्य पछ्याएको मोन्ट्रिलए टाइगर्स ५ बल अगावै १२८ रनमा अलआउट भयो ।
मोन्ट्रियलका लागि शकिबले २१ बल र दीपेन्द्रले २४ बलमा समान २८ रन बनाए पनि पर्याप्त भएन । २४ बल खेलेका दीपेन्द्रले २ चौका प्रहार गरेका थिए । दिलप्रित सिंहले २४ रन बनाए ।
ब्राम्पटनका लोगा भान विकले ३ तथा कोलिन डे ग्रान्डहोमले २ विकेट लिए । शाहिद अहमदजाईले पनि २ विकेट लिए ।
त्यसअघि टस हारेर पहिले ब्याटिङ गरेको ब्राम्पटनले १९.५ ओभरमा सबै विकेट गुमाएर १४३ रन बनाएको थियो । ब्राम्पटनका लागि कोलिन डे ग्रान्डहोमले ४० बलमा ७ चौका र १ छक्का प्रहार गर्दै सर्वाधिक ५६ रन बनाए ।
उस्मान खानले ३३ तथा मार्क च्यापम्यानले २१ रन जोडे ।
मोन्ट्रियलका कार्लोस ब्रेथवेइटे र आयन अफजल खानले ४-४ विकेट लिए । २ ओभर बलिङ गरेका दीपेन्द्र सिंह ऐरीले २० रन खर्चेर विकेटविहिन भए ।
