भानुभक्त र घाँसीको सालिक तोडफोड गरेको आरोपमा एक जना पक्राउ
लमजुङ । लमजुङको मध्यनेपाल नगरपालिका–४ स्थित दुईपिप्ले बगैँचा रिस्ती खोलापुल नजिक रहेको भानु घाँसी संवाद पार्क भित्रका आदिकवि भानुभक्त आचार्य र प्रेरणादायी घाँसी खड्कबहादुर ठाडा मगरको सालिक तोडफोड गरेको आरोपमा प्रहरीले एक जनालाई पक्राउ गरेको छ।
जिल्ला प्रहरी कार्यालय लमजुङका अनुसार साउन ७ गते राति करिब १०ः३० बजे अज्ञात व्यक्तिले सालिकमा तोडफोड गरी क्षति पुर्याएको घटना भएको थियो। घटनाको अनुसन्धानका क्रममा तनहुँको व्यास नगरपालिका–७ स्थायी घर भएका ३४ वर्षीय रोशन कुँवरलाई इलाका प्रहरी कार्यालय भोर्लेटारबाट खटिएको प्रहरी निरीक्षक ध्रुवप्रसाद शर्माको नेतृत्वको टोलीले साउन ८ गते पक्राउ गरेको हो।
पक्राउ परेका कुँवरलाई जिल्ला प्रहरी कार्यालय लमजुङमा ल्याई आपराधिक उपद्रव सम्बन्धी कसुरमा लमजुङ जिल्ला अदालतबाट पाँच दिनको म्याद थप अनुमति लिएर थप अनुसन्धान भइरहेको प्रहरीले जनाएको छ।
