कारमाथि चढेर व्यस्त सडकमै जब एक जनाले ‘फिल्मी शैली’मा पैसा उडाउन थाले…
काठमाडौँ । भारतको राजस्थान राज्यको राजधानी जयपुरमा एउटा अनौठो घटना प्रकाशमा आएको छ । व्यस्त सडकमा एक अज्ञात व्यक्तिले बटुवाहरुलाई भेला गरेर ‘फिल्मी शैली’ मा पैसा उडाएका हुन् ।
कारमाथि उभिएर ती व्यक्तिले पैसा छर्दै गर्दा टिप्नका लागि भेला भएकाहरु पनि तँछाड मछाड गरिरहेका थिए । तर पैसा त्यसरी छर्ने व्यक्तिले आफ्नो अनुहार भने मुखौटोले ढाकेका थिए ।
धमाधम पैसा हावामा उडाउन थालेपछि टिप्नका लागि रिक्सा चालकदेखि लिएर बाइक, कारमा सवार व्यक्तिहरु पनि होडबाजी गरिरहेका थिए ।
सडकमै यसरी भिड जम्मा गरेर पैसा बाँडेको दृश्य समेटेर तयार पारिएको भिडियो सामाजिक सञ्जालमा समेत भाइरल भयो । त्यसपछि प्रहरीले भिडियोमा देखिएको कारको नम्बरका आधारमा ती व्यक्तिको पहिचान गरी गिरफ्तार गरेको छ ।
जयपुर पुलिसका अनुसार ती व्यक्तिलाई शान्ति भङ्ग गरेको आरोपमा पक्राउ गरिएको छ । प्रहरीलाई दिएको प्रारम्भिक बयानमा ती व्यक्तिले मजाका लागि आफूले यस्तो काम गरेको बताएका छन् । उनीमाथि थप अनुसन्धान भइरहेको प्रहरीको भनाइ छ ।
