धनकुटा नगरपालिकाको ३ नम्बर वडा पूर्ण खोप सुनिश्चित घोषणा
नारायण कुमार राई/धनकुटा,१८ फागुन । धनकुटा नगरपालिका वडा नं.३ लाई पूर्ण खोप सुनिश्ति वडा घोषणा गरिएको छ ।
यस अघि दुई पटक पूर्ण खोप सुनिश्चित घोषणा भएको धनकुटाले आगामी २०८२ मा जिल्लालाई पूर्ण खोप सुनिश्चित घोषणा गर्ने कार्यक्रम अनुसार वडालाई पूर्ण खोप सुनिश्चित घोषणा गरिएको हो ।
वडा कार्यालयमा आयोजित एक घोषणा कार्यक्रममा वडा अध्यक्ष बिकास घिमिरेले वडालाई पूर्ण खोप सुनिश्चित भएको घोषणा गर्नुभएको छ ।
खोपको सुनिश्चितताका लागि वडाका तीन स्वास्थ्य स्वयंसेविका र चार स्वास्थ्यकर्मीको टोलिले १५ दिनको समयमा पूर्ण खोपको कार्यक्रम सम्पन्न गरेको सिनियर अहेव अन्जना तिम्सिनाले जानकारी दिनुभयो ।
वडाका १६ देखि ५९ महिना सम्मका एक सय १८ जना बालबालिकाहरुले पूर्ण खोपको मात्रा पुरा गरिएको तिम्सिनाले जानकारी दिनुभयो ।
बिद्यालय भर्ना गर्दा जन्म दर्ता अनिवार्य गरेझैं पूर्ण खोप लगाएको कार्ड पनि बिद्यालयमा अनिवार्य गर्न सके पूर्ण खोप सुनिश्चित कार्यक्रम प्रभावकारी हुने अध्यक्ष घिमिरेको भनाई छ ।
