धनकुटामा सम्पन्न ‘पूर्वाञ्चल गट ट्यालेन्ट-६’ को उपाधि क्षितिजा र एक्स्प्रेस कृउलाई
धनकुटा । पूर्वाञ्चल गट ट्यालेन्ट सिजन-६ को फाइनल सम्पन्न भएको छ ।
गत शनिबार धनकुटा नगरपालिका-५ स्थित तल्लो टुँडिखेलमा सम्पन्न भएको हो ।
प्रतियोगिताको फाइनलमा गायन तर्फ सुनसरीकी क्षितिजा मगर र नृत्यतर्फ इलामको एक्स्प्रेस कृउ उपाधि विजेता बने ।
यसैगरी गायनतर्फ पाँचथरका दिनेस भारती दोस्रो र संखुवासभाका कमल राई तेस्रो भएका छन् भने नृत्यतर्फ इलामकी बर्षा राई र धनकुटाको अमिशा राई र बर्खा श्रेस्ठले तृतीय स्थान प्राप्त गरे ।
रिक्रियशन मल्टिमिडिया एण्ड इन्टरटेनमेन्ट र टिन्स कृउ डान्स सेन्टर धन्कुटाले आयोजना गरेको प्रतियोगितामा गायनतर्फ १० र नृत्यतर्फ ९ प्रतिस्पर्धी सहभागी रहेको कार्यक्रम संयोजक सुमन योगीले बताए । दुवै विधातर्फका विजेताले ५ लाख नगद र ५ लाख बराबरको जीवन बिमा गरिएको छ ।
यस्तै उपविजेतालाई नगद ५०/५० हजार रुपैया, सेकेण्ड रनरअपलाई २०/२० हजार रुपैया सहित विभिन्न पुरस्कारकाे व्यवस्था मिलाइएको कार्यक्रम संयोजक सुमन योगीले जानकारी दिए । गत असार ५ देखि सुरु भएको अडिसनमा ३ सय ८९ जनाले भाग लिएका थिए । कोशी प्रदेशका १४ जिल्लाबाट विभिन्न चरणमा भएको अडिसनबाट गायन र नृत्यतर्फका १९ जना फाइनलमा पुगेका थिए ।
