धरानमा दुईदिने ‘धरान फिल्म फेस्टिभल २०२६’ आयोजना हुने
हिराराज राई, धनकुटा । नेपाली सिनेमा क्षेत्रको प्रवर्द्धन, सिनेमा संस्कृतिको विकास तथा सिर्जनात्मक प्रतिभालाई प्रोत्साहन गर्ने उद्देश्यसहित ‘धरान फिल्म फेस्टिभल (DFF) २०२६’ आयोजना हुने भएको छ।
फेस्टिभल आगामी २०८३ साल मंसिर २७ र २८ गते धरानस्थित बीपी कोइराला स्वास्थ्य विज्ञान प्रतिष्ठान (BPKIHS) को अडिटोरियम हलमा सञ्चालन हुनेछ।
आयोजकका अनुसार दुईदिने फेस्टिभलमा नेपाली सिनेमाको विकास, प्रवर्द्धन तथा चलचित्रकर्मीबीच अनुभव आदानप्रदान गर्ने उद्देश्यले विभिन्न कार्यक्रम आयोजना गरिनेछ। कार्यक्रममा निर्माता, निर्देशक, कलाकार, प्राविधिक, सिनेमाप्रेमी तथा नयाँ पुस्ताका सिर्जनशील प्रतिभालाई एउटै मञ्चमा ल्याई नेपाली चलचित्र क्षेत्रसँग जोड्ने लक्ष्य लिइएको छ।
फेस्टिभलले नेपाली चलचित्र उद्योगको विकासमा टेवा पुर्याउनुका साथै धरानलाई कला, संस्कृति र सिनेमा गतिविधिको महत्वपूर्ण केन्द्रका रूपमा स्थापित गर्न सहयोग पुग्ने आयोजकको विश्वास छ।
धरानमा पहिलोपटक आयोजना हुन लागेको यस सिनेमा महोत्सवप्रति चलचित्रकर्मी तथा सिनेमाप्रेमीहरूको चासो बढ्दै गएको छ। कार्यक्रममा चलचित्रकर्मी, कलाकार तथा दर्शकहरूको उल्लेखनीय सहभागिता रहने अपेक्षा आयोजकले गरेको छ।
