धनकुटाको साँगुरीगढीमा पहिरोले गोठ पुरिएपछि…
हिराराज राई,धनकुटा । धनकुटा जिल्लाको साँगुरीगढी गाउँपालिका–९ बाहुनाकेमा गए रातिको अविरल वर्षापछि गएको पहिरोले एक स्थानीयको गोठ पुरिएको छ।
स्थानीय स्रोतका अनुसार, सोम बहादुर राईको गोठ पहिरोले पुरिँदा करिब साढे ३ लाख रुपैयाँ बराबरको क्षति भएको छ। यद्यपि, घटनामा मानवीय क्षति भने भएको छैन।
गोठसँगै रहेका चिरानी काठ, प्रयोग नगरिएका नयाँ जस्ता पाता, नास्पाती, कतहर, आँप, एभोकाडो, रूद्राक्षका बोट, खाद्यान्नबाली, कुखुरा, र मोहुरीसहितका दुंढ पहिरोले बगाएको र पुरिएको छ। खोरसँगै बाख्रा र सुँगुर जोगिएको र गाई बस्तुहरू पनि जोगिएको छ।
राई विगत लामो समयदेखि सो स्थानमा खेतीपाती र पशुपालन गर्दै आएका थिए। उनका स्थायी घर भने खयरबोटेमा रहेको छ।
