उर्लाबारीमा २७ दिने कर तथा खाद्य सुरक्षा अभियान शुरू
उर्लाबारी । “म तिर्छु कर, बनाउँछु उर्लाबारी नगर” भन्ने मूल नारासहित उर्लाबारी नगरपालिकाले कर तथा खाद्य सुरक्षा सम्बन्धी २७ दिने व्यापक सचेतना अभियान संचालन गरेको छ।
सोमबार सो अभियानको वडा ५ र ६ को सिमानास्थित मधुमल्ला रोडमा नगरप्रमुख गंगाप्रसाद खरेल, प्रमुख प्रशासकीय अधिकृत अभयकुमार गुप्ता, वडा अध्यक्षहरू तथा नेपाल प्रहरी प्रतिनिधिहरूको संयुक्त उपस्थितिमा उद्घाटन भएको छ ।
अभियानको पहिलो दिन बजार क्षेत्रमा रहेका व्यवसायीलाई करका प्रकार, कर तिर्ने प्रक्रिया, अनलाइन भुक्तानी प्रणाली, तथा खाद्य सुरक्षाका आधारभूत मापदण्डबारे प्रत्यक्ष जानकारी दिइयो। नगरपालिकाले स्वेच्छिक कर भुक्तानीलाई प्रोत्साहन गर्न कर तिर्ने व्यवसायीका लागि विशेष छुट व्यवस्था समेत गरेको छ।
अनलाइन कर भुक्तानी प्रणालीका बारेमा अधिकारीहरूले नगरको सेवा प्रणालीलाई छिटो, छरितो र आधुनिक बनाउन यसले महत्वपूर्ण योगदान पुर्याउने बताएका छन्। राजस्व व्यवस्थापनलाई पारदर्शी, दिगो र सेवा–उन्मुख बनाउने उद्देश्यका साथ सुरु गरिएको यो अभियान २७ दिनसम्म निरन्तर सञ्चालन हुने नगरपालिकाले जनाएको छ।
अभियानको क्रममा राजस्व शाखाका कर्मचारी क्षेत्रमै खटिएर नागरिक तथा व्यवसायीसँग प्रत्यक्ष संवाद गरिरहेका छन्। यसबाट करप्रति नागरिकको पहुँच, बुझाइ र विश्वास वृद्धि हुने नगरपालिकाको अपेक्षा रहेको छ ।
