उदयपुरको गाईघाटमा अनौठो र डरलाग्दो घटनामा संलग्न आरोपित २३ वर्षीय युवक यसरी भए जेल चलान
उदयपुर । उदयपुरको गाईघाट पिजी चोक नजिकै रहेको स्केटिङ पार्कबाट एक्कासी दुई युवक बेपत्ता हुन्छन् । आजभन्दा ३ महिना अघि अर्थात भदौ १० गतेको घटना हो यो । शिवालयटोलका १८ वर्षीय प्रविण श्रेष्ठ र शनिमन्दिर क्षेत्रका २० वर्षीय संजीव राई केही क्षणमै गायब हुन्छन् ।
ती दुईलाई सोही दिन रातारात एक समूहले बरुवा खोलाको किनारामा पुर्याइन्छ । अन्धाकार रात । त्यसपछि प्रविण र संजीवको अर्धनग्न अवस्थामा पछाडी दुवै हात बाँधीएको भिडियो सामाजिक संजालभर सार्वजनिक हुन्छ । जहाँ एक व्यक्तिले मोवाईलमा भिडियो खिच्दै एकोहोरो लाठी बर्साइरहेको देख्न सकिन्छ ।
सोही घटनामा संलग्न रहेको आरोपमा तीन महिनापछि लुकिछिपी बस्दै आएको अवस्थामा त्रिनपा ११ बगरटोलका २३ वर्षीय उज्वल राई पक्राउ परेका छन् । प्रहरीलाई तीन महिनासम्म छक्याएर भाग्न सफल उज्वललाई समातिएसँगै जिल्ला अदालत उदयपुर लगिएको थियो ।
अदालतको आदेशमा उनलाई पुर्पक्षका लागि जिल्ला कारागार उदयपुर चलान गरिएको हो ।
