लेटाङमा मोटरसाइकल दुर्घटना हुंदा चालक गुरुङको मृत्यु
मोरङ । गए राति करिब ९ बजे मोरङ जिल्लाको लेटाङ नगरपालिका–९ अन्तर्गत जाँते–पथरी सडक खण्डमा मोटरसाइकल दुर्घटना हुँदा एक जनाको मृत्यु भएको छ।
जाँतेबाट पथरीतर्फ जाँदै गरेको मे ६ प २५९४ नम्बरको मोटरसाइकल दुर्घटनामा परेपछि घटनाको सूचना प्राप्त हुनासाथ अस्थायी प्रहरी चौकी जाँते र इलाका प्रहरी कार्यालय लेटाङबाट प्रहरी निरीक्षकसहितको टोली घटनास्थलमा खटिएको थियो।
दुर्घटनामा घाइते मोटरसाइकल चालक मोरङ, पथरी शनिश्चरे नगरपालिका–१० नमुना टोल निवासी करिब ३०/३२ वर्षीय विजय गुरुङ र पछाडि सवार सोही स्थान निवासी करिब २६/२७ वर्षीय अरुण गुरुङलाई उपचारका लागि लेटाङ नगर अस्पताल, लेटाङमा ल्याइएको थियो। त्यहाँ सामान्य उपचार पश्चात थप उपचारका लागि दुवैलाई न्युरो अस्पताल, विराटनगर पठाइएको छ ।
प्रहरीका अनुसार उपचारकै क्रममा चालक विजय गुरुङको मृत्यु भएको छ। पछाडि सवार अरुण गुरुङको अवस्था सम्बन्धमा थप विवरण आउन बाँकी रहेको प्रहरीले जनाएको छ। दुर्घटनाको कारणबारे प्रहरीले आवश्यक अनुसन्धान गरिरहेको जनाएको छ।
