मोरङको पथरीशनिश्चरेबाट लागूऔषध ब्राउन सुगर सहित तीन जना पक्राउ
मोरङ । मोरङको पथरीशनिश्चरेबाट लागुऔषध खैरो हेरोइन (ब्राउन सुगर)सहित ३ जना युवा शुक्रबार दिउँसो पक्राउ परेका छन् ।
पथरीशनिश्चरे नगरपालिका–४ सम्झना चोकका २३ वर्षीय ज्ञानदीप राई, पथरीशनिश्चरे–६ का २४ वर्षीय मिथुन मण्डल र पथरीशनिश्चरे–७ का २२ वर्षीय प्रज्वल राईलाई पक्राउ गरिएको प्रहरीले जनाएको छ । ज्ञानदीपको घरमा लागुऔषधको कारोबार भइरहेको विशेष सूचनाका आधारमा इलाका प्रहरी कार्यालय पथरीबाट खटिएको टोलीले उनीहरुलाई पक्राउ गरेको हो ।
प्रहरीले दिउँसो १ बजेतिर घरमा छापा हानेर ज्ञानदीपको कोठाबाट ब्राउन सुगरजस्तो देखिने पदार्थ १ ग्राम बरामद गरेको छ । पक्राउ परेका तीनै जनालाई इलाका प्रहरी कार्यालय पथरीमा राखिएको छ ।
उनीहरुविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।
