झापाको धुलाबारीमा निर्माणाधीन ईस्टर्न होटलको चौंथो तलाबाट लडेर कामदारको मृत्यु
झापा । झापाको मेचीनगर नगरपालिका–१० धुलाबारीस्थित निर्माणाधीन होटलमा काम गर्ने क्रममा एक जना कामदारको लडेर मृत्यु भएको छ।
प्रहरीका अनुसार आज साँझ करिब ६ः३० बजे न्यु इन्फ्रा हेवन कम्पनी लिमिटेडद्वारा निर्माण भइरहेको ईस्टर्न होटलको चौथो तलामा फलामको पाइप सार्ने क्रममा कामदार नरेश कुमार मण्डल अचानक तल खस्दा गम्भीर घाइते भएका थिए।
सप्तरी जिल्ला खडक नगरपालिका–१ सिसुवाबेल्ही स्थायी घर भई हाल काम गर्दै आएका अन्दाजी २१ वर्षीय मण्डललाई गम्भीर अवस्थामा मेची आम्दा अस्पताल, धुलाबारी लगिएको थियो। उपचारकै क्रममा साँझ ७ः०० बजे उनको मृत्यु भएको प्रहरीले जनाएको छ।
घटनाबारे जानकारी प्राप्त हुनासाथ इलाका प्रहरी कार्यालय धुलाबारीबाट प्रहरी निरीक्षक नकुल राज गौतमको कमाण्डमा खटिएको टोलीले घटनास्थल पुगेर आवश्यक अनुसन्धान गरिरहेको छ।
मृतकको शव हाल मेची आम्दा अस्पतालमै राखिएको छ। घटनाको विस्तृत अनुसन्धान भइरहेको प्रहरीले जनाएको छ।-स्रोत:खबरखेती
