श्रम संस्कृति पार्टीको पहलमा श्रमदानबाट सडक सुधार, स्थानीयको सक्रिय सहभागिता
लेटाङ,२८ पुस । लेटाङ नगरपालिका वडा नं. १ मा श्रम संस्कृति पार्टीको पहलमा श्रमदानमार्फत मुर्चुङ्गी–भलुवा हुँदै लाख क्षेत्रसम्मको सडक आईतबार मर्मत गरिएको छ।
स्थानीय बासिन्दा र पार्टी कार्यकर्ताको सामूहिक सहभागितामा लामो समयदेखि जीर्ण अवस्थामा रहेको सडकखण्ड सम्याइएको हो।
श्रमदानका क्रममा सडकका खाल्डाखुल्डी पुर्ने, साघुरो भाग फराकिलो बनाउने तथा सडक छेउछाउका झाडी सफा गर्ने काम गरिएको छ। यसले आवतजावत सहज हुनुका साथै दुर्घटनाको जोखिम पनि कम हुने अपेक्षा गरिएको छ।
स्थानीयले श्रम संस्कृतिको यो पहललाई सकारात्मक रूपमा लिँदै यस्ता जनहितका कार्यलाई निरन्तरता दिनुपर्ने बताएका छन्।
