ताप्लेजुङमा जारी प्रथम लिङ्तेप गोल्डकप : सेमिफाइनका खेल हुँदै
ताप्लेजुङ, पुस १२ गते । ताप्लेजुङको मेरिङदेन गाउँपालिका–४ लिङ्तेपमा जारी आमन्त्रित प्रथम लिङ्तेप गोल्डकपमा सोमबार सेमिफाइनलका खेल हुने भएको छ । बसन्त पञ्चमीको अवसरमा प्रगतिशील युवा क्लबको आयोजनामा सञ्चालित गोल्ड कपमा सोमबार सेमिफाइनलका खेल हुने भएको हो ।
जस अन्तरगत पहिलो सेमिफाइनल खेलमा लालिमा युवा क्लब ढुङ्गेसाँघु र साथीभाइ सामाजिक युवा क्लबबीच प्रतिस्पर्धा हुने भएको छ । लालिमाले शुकबार भएको उद्घाटन खेलमा प्रगतिशील युवा क्लब आयोजक निलोलाई ७–३ गोल अन्तरले पराजित गर्दै सेमिफाइनलमा प्रवेश गरेको हो । यता आइतबार भएको खेलमा साथीभाइले पुवाजुङ युथ क्लब इलामलाई २–० गोल अन्तरले पराजित गर्दै सेमिफाइनलमा लालिमा सँग भेट पक्का गरेको हो ।
यस्तै सोमबार नै हुने दोस्रो सेमिफाइनल खेलमा आयोजक रातो र कुम्मायक कुसायक पाँचथरबीच प्रतिस्पर्धा हुँदै छ । आयोजक रातोले शनिबार भएको खेलमा मानाभारा युथ क्लब खेजेनिमलाई ४–१ गोल अन्तरले पराजित गर्दै सेमिफाइनलमा स्थान पक्का गरेको थियो । यस्तै कुम्मायक कुसायकले आइतबार भएको खेलमा पृथ्वी लेस्नमाया युथ क्लबलाई ५–२ गोल अन्तरले पराजित गर्दै सेमिफाइनलमा आयोजक सँग भेट पक्का गरेको हो ।
सोमबार विजेता हुने टोलीहरूले मङ्गलबार हुने फाइनल खेलमा उपाधिका लागि प्रतिस्पर्धा गर्ने खेल संयोजक विश्व नाल्बोले जानकारी दिनुभयो । तुलसी स्मृति प्रतिष्ठान खेल मैदानमा सञ्चालन भइरहेको प्रतियोगिताका विजेता टिमले तीन लाख दुई हजार ८२ रुपियाँसहित ट्रफी मेडल र प्रमाण पत्र प्राप्त गर्ने छन् । यस्तै दोस्रो हुने टिमले एक लाख ५२ हजार ८२ रुपियाँसहित ट्रफी, मेडल र प्रमाणपत्र प्राप्त गर्ने छ । प्रत्येक खेलको म्यान अफ दि म्याच हुने खेलाडीलाई नगद दुई हजार रुपियाँ पुरस्कार प्रदान गरिनेछ ।
त्यस्तै, प्रतियोगिताको उत्कृष्ट गोल किपर, उत्कृष्ट डिफेन्डर र सर्वाधिक गोलकर्तालाई जनही ४ हजार रुपियाँ र प्रतियोगिताको उत्कृष्ट खेलाडीलाई आठ हजार रुपियाँ प्रदान गरिनेछ । फुटबलको माध्यमबाट मेरिङदेनमा रहेका पर्यटकीय क्षेत्रको प्रचारप्रसार गर्ने उद्देश्यले गोल्डकपको आयोजना गरिएको हो ।
प्रतियोगिता सञ्चालन गर्न करिब ११ लाख रुपियाँ लाग्ने अनुमान गरिएको आयोजकले जनाएको छ ।
