झापाको अर्जुनधारामा गुडिरहेको ट्याक्टरबाट खसेर एक जनाको मृत्यु
झापा । झापाको अर्जुनधारा नगरपालिका-७ स्थित बिरिङ खोलामा गुडिरहेको ट्याक्टरबाट खसेर एक जना सह-चालकको मृत्यु भएको छ।
आज बिहान ९:४० बजेको समयमा बिरिङ खोलाबाट बालुवा लोड गरी गन्तव्यतर्फ जाँदै गरेको प्र१-०१-००१त ९०१० नम्बरको ट्याक्टरको ढालाबाट खस्दा अर्जुनधारा-३ का १६ वर्षीय सरोज श्रेष्ठको ज्यान गएको हो।
ट्याक्टर गुडिरहेकै अवस्थामा अचानक ढालाबाट खसेका श्रेष्ठलाई सोही ट्याक्टरको पछाडिको चक्काले किचेको थियो। दुर्घटनालगत्तै गम्भीर घाइते भएका उनलाई तत्काल उपचारका लागि शनिश्चरेस्थित शङ्कर अस्पताल पुर्याइएको भए पनि चिकित्सकले जाँचका क्रममा मृत घोषणा गरेका थिए। मृतक श्रेष्ठ सोही ट्याक्टरका सह-चालक हुन्।
घटना लगत्तै प्रहरी चौकी शनिश्चरेबाट खटिएको प्रहरी टोलीले ट्याक्टर र चालकलाई नियन्त्रणमा लिएको छ। यस्तै, ट्याक्टरका धनी अर्जुनधारा-४ का ५६ वर्षीय अशोकलाल दनुवारलाई पनि प्रहरीले नियन्त्रणमा लिएको छ। प्रहरीले घटनाका सम्बन्धमा आवश्यक कानुनी प्रक्रिया अघि बढाउँदै थप अनुसन्धान गरिरहेको जनाएको छ।
