मलेसिया माथि नेपाली महिला टोलीको संघर्षपुर्ण जित
काठमाडौं, ६ जेठ । नेपाल मलेसिया माथिको पहिलो ट्वान्टी–२० खेलमा जित हासिल गरेको छ ।
मलेसियाको क्वालाम्पुरमा रहेको बायोमास ओभलमा बुधबार सम्पन्न खेलमा घरेलु टोलीमाथि नेपालले २ विकेटको संघर्षपुर्ण जित हासिल गरेको हो ।
मलेसियाले दिएको ६८ रनको सामान्य लक्ष्य नेपालले १७.३ ओभरमा पूरा गर्न ८ विकेट गुमाएको थियो । नेपालको जितमा सम्झना खड्काले ३९ बलमा २ चौकाको सहयोगमा सर्वाधिक ३२ रनको इनिङ खेलेकी थिइन् ।
रुवि पोदार १५ रनमा आउट हुँदा नेपालका उनले मात्रै दोहोरो अंकमा रन बनाउन सफल भइन । मलेसियाका लागि नुर कवाल्शाले ३, अल्सा एलिसा र एलसा हन्टरले समान २ तथा नुर दानियाले १ विकेट लिएको खेल रोमाञ्चक बनाएको थियो ।
त्यसअघि पहिले ब्याटिङ गरेको मलेसियाले १६.५ ओभरमा सबै विकेट गुमाएर ६७ रनको योगफलमा अल आउट भएको थियो । मलेसियाका लागि इल्सा हन्टर बाहेकका अन्य खेलाडीले पनि दोहोरो अंकमा रन जोड्न सकेनन् ।
नेपालका लागि पुजा महतोले ३, मनिषा उपाध्याय र रिया शर्माले समान २ तथा कविता कुवँर र सिता राना मगरले समान १ विकेट लिएका थिए ।
यो जितसँगै २ खेलको ट्वान्टी २० शृङ्खलामा नेपालले १–० को अग्रता लिन सफल भएको छ ।
एसियन गेम्स छनोट तथा एसिसी प्रिमियर कप खेल्न मलेसिया पुगेको नेपाली टोलीले घरेलु टोलीसँग तयारी स्वरुप २ खेलको ट्वान्टी २० अन्तर्राष्ट्रिय शृङ्खला खेल्न लागेको हो । दोस्रो ट्वान्टी २० अन्तर्राष्ट्रिय खेल शुक्रबार रहेको छ ।
