झापाको भद्रपुरमा दुई किशोरीमाथि जबर्जस्ती करणी गरेको आरोपमा दुई युवा पक्राउ
झापा, असार १२ । झापाको भद्रपुरमा घर पुर्याइदिने बहाना बनाएर दुई किशोरीमाथि जबर्जस्ती करणी गरेको आरोपमा दुई युवालाई प्रहरीले पक्राउ गरेको छ।
जिल्ला प्रहरी कार्यालय झापाका अनुसार असार १० गते साँझ भद्रपुर नगरपालिका–५ मा उक्त घटना भएको हो। १४ वर्षीया एक किशोरी र उनकी १७ वर्षीया साथी घर नजिकै रहेको विद्यालय परिसरमा घुमफिर गर्न गएका बेला चिनजानका दुई युवाले उनीहरूलाई घरसम्म पुर्याइदिने प्रस्ताव गरेका थिए।
प्रहरीको प्रारम्भिक अनुसन्धानअनुसार भद्रपुर–५ निवासी २१ वर्षीय शिवा सहनी र १८ वर्षीय अभिषेक महतोले किशोरीहरूलाई एकान्त स्थानतर्फ लगेर छुट्टाछुट्टै स्थानमा जबर्जस्ती करणी गरेको आरोप लागेको छ।
जाहेरीअनुसार सहनीले १४ वर्षीया किशोरीलाई स्थानीय एक व्यक्तिको प्रयोगविहीन भुइँघरमा लगेर त्यहाँ रहेको त्रिपालमाथि लडाई जबर्जस्ती करणी गरेका थिए। त्यस्तै, महतोले १७ वर्षीया किशोरीलाई नजिकैको केराघारीमा लगेर जबर्जस्ती करणी गरेको आरोप छ।
घटनापछि पीडितहरूले परिवार र स्थानीयवासीको सहयोगमा प्रहरीमा उजुरी दिएका थिए। उजुरी दर्ता भएपछि प्रहरीले दुवै आरोपितलाई नियन्त्रणमा लिएर अनुसन्धान अघि बढाएको जिल्ला प्रहरी कार्यालय झापाले जनाएको छ।
प्रहरीले पीडितहरूको उमेर कम भएकाले उनीहरूको पहिचान गोप्य राखिएको जनाएको छ। साथै, पीडित र उनीहरूका परिवारलाई कानुनी तथा मनोसामाजिक सहयोग उपलब्ध गराउन सम्बन्धित निकायसँग समन्वय भइरहेको प्रहरीले जनाएको छ।
प्रहरीले दुवै आरोपितविरुद्ध जबर्जस्ती करणीसम्बन्धी कसुरमा मुद्दा दर्ता गरी थप अनुसन्धान गरिरहेको जनाएको छ।
