विराटनगरमा भारतिय सवारीसाधनबाट अवैध रकम असुल गर्ने ३ जना पक्राउ
विराटनगर । भारतबाट नेपाल प्रवेश गर्ने सवारी साधनका चालकहरूलाई अनाधिकृत रूपमा दबाब दिई अवैध रकम असुल गरी आर्थिक लाभ लिएको आरोपमा मोरङ प्रहरीले तीन जनालाई पक्राउ गरेको छ।
जिल्ला प्रहरी कार्यालय मोरङका अनुसार गत असार १४ गते करिब १४:३० बजे विराटनगर महानगरपालिका–१५ स्थित २ नं. ढाट नजिक रहेको यात्रु सहायता शाखामा भारतीय नम्बर प्लेटका सवारी साधनका चालकहरूलाई अनाधिकृत रूपमा दबाब दिई रकम असुल गरिएको भन्ने विशेष सूचनाका आधारमा प्रहरी टोली परिचालन गरिएको थियो।
जिल्ला प्रहरी कार्यालय मोरङ र इलाका प्रहरी कार्यालय रानीबाट खटिएको संयुक्त टोलीले सो गतिविधिमा संलग्न रहेको आरोपमा तीन जनालाई नियन्त्रणमा लिएको हो।
पक्राउ पर्नेहरूमा मोरङ विराटनगर–१३ बस्ने ६३ वर्षीय सुरेश कर्ण,विराटनगर–०१ बस्ने ४४ वर्षीय सञ्जय केवट र विराटनगर–१५ बस्ने ६७ वर्षीय नरेन्द्र थापा रहेका छन्।
उनीहरूलाई इलाका प्रहरी कार्यालय रानीमा राखी थप अनुसन्धान भइरहेको प्रहरीले जनाएको छ।
