धनकुटाको तमोर नदीमा हाम फालेर आत्महत्या गर्ने तयारीमा रहेका व्यक्तिको सकुशल उद्धार
धनकुटा । सुनसरीको धरान उपमहानगरपालिका–११ निवासी ४३ वर्षीय सोमबहादुर तामाङलाई धनकुटाको तमोर नदीको पुलबाट प्रहरीले सकुशल उद्धार गरेको छ।
प्रहरीका अनुसार सोमबहादुरले घरायसी विवादका कारण को १ ह ६५८४ नम्बरको अटोमा धनकुटातर्फ जाँदै तमोर नदीमा हाम फालेर आत्महत्या गर्ने भन्दै परिवारलाई फोनमार्फत जानकारी गराएका थिए।
यस सम्बन्धी सूचना बिहीबार साँझ करिब ४ः३० बजे इलाका प्रहरी कार्यालय धरानबाट जिल्ला प्रहरी कार्यालय धनकुटामा प्राप्त भएपछि प्रहरी चौकी मुलघाटबाट प्रहरी सहायक निरीक्षक (प्र.स.नि.) रबिन तामाङको कमाण्डमा प्रहरी टोली तत्काल परिचालन गरिएको थियो।
खोजतलासका क्रममा धनकुटा नगरपालिका–९ स्थित तमोर नदीको पुलमा सोमबहादुर सकुशल फेला परेका थिए। प्रहरीले उनलाई सुरक्षित रूपमा उद्धार गरी अटोसहित प्रहरी चौकी मुलघाटमा ल्याएको तथा उनका आफन्तलाई जिम्मा लगाउने प्रक्रिया अघि बढाएको जनाएको छ।
घटनाका सम्बन्धमा थप अनुसन्धान भइरहेको जिल्ला प्रहरी कार्यालय धनकुटाले जनाएको छ।
