भोजपुरमा ७ सय गाँजाका बोट तथा बेर्ना फडानी गरी नष्ट
भोजपुर । भोजपुर प्रहरीले जिल्लाका विभिन्न स्थानमा अवैध रूपमा लगाइएका तथा प्राकृतिक रूपमा उम्रिएका गाँजाका बोट र बेर्ना फडानी गरी नष्ट गरेको छ।
प्रहरीका अनुसार साउन ८ गते इलाका प्रहरी कार्यालय घोडेटार, इलाका प्रहरी कार्यालय बोयाङ तथा प्रहरी चौकी हसनपुरबाट खटिएको संयुक्त प्रहरी टोलीले हतुवागढी र आमचोक गाउँपालिकाका विभिन्न डाँडापाखामा अभियान सञ्चालन गरेको थियो।
अभियानका क्रममा करिब तीन रोपनी क्षेत्रफलमा फैलिएका ७ सय वटा गाँजाका बेर्ना र नाभो बोट फडानी गरी जलाएर नष्ट गरिएको प्रहरीले जनाएको छ।
जिल्लामा अवैध लागूऔषध खेती नियन्त्रणका लागि यस्ता अभियानलाई निरन्तरता दिइने प्रहरीको भनाइ छ।
