सुनसरीको कोशी कटान क्षेत्रमा तनाव चर्कियो, आगजनी र तोडफोड
सुनसरी । सुनसरीको कोशी कटान क्षेत्रको अवस्था थप तनावग्रस्त बनेको छ। प्रदर्शनकारीले विभिन्न स्थानमा आगजनी, तोडफोड तथा लुटपाट गरेपछि सुरक्षा व्यवस्था कडा पारिएको छ भने प्रहरी ठूलो संख्यामा परिचालन गरिएको छ।
प्रहरीका अनुसार देवानगञ्ज गाउँपालिका–३ कप्तानगञ्जमा भएको घटनाको विरोधमा उत्रिएको समूहले पसलहरूमा तोडफोड, लुटपाट र आगजनी गर्नुका साथै पूर्व–पश्चिम राजमार्ग अवरुद्ध गरेको छ।
प्रदर्शनकारीहरूले सुनसरी खण्डका विभिन्न स्थानमा टायर बालेर प्रदर्शन गर्दै यातायात आवागमनसमेत प्रभावित बनाएका छन्।
गत आइतबार कप्तानगञ्जमा दुई समूहबीच भएको झडप नियन्त्रणमा लिन प्रहरीले चलाएको गोली लागेर एक जनाको मृत्यु भएको थियो भने नौ जना घाइते भएका थिए। त्यसयता क्षेत्रको सुरक्षा अवस्था संवेदनशील बनेको छ।
घटनापछि स्थानीय प्रशासनले दक्षिणी क्षेत्रका विभिन्न स्थानमा कर्फ्यु आदेश जारी गरेको थियो। कर्फ्युका बीच पनि सोमबार दिनभर प्रदर्शन जारी रहेपछि मंगलबार पनि कर्फ्युलाई निरन्तरता दिइएको छ।
प्रमुख जिल्ला अधिकारी ईश्वरीप्रसाद अर्यालद्वारा जारी सूचनाअनुसार मंगलबार बिहान ७ बजेदेखि साँझ ७ बजेसम्म देवानगञ्ज गाउँपालिका र हरिनगर गाउँपालिकाको सम्पूर्ण क्षेत्रमा कर्फ्यु लागू गरिएको छ। साथै हरिनगरा, भुटाहा, कप्तानगञ्ज, घुस्की र देवानगञ्ज बजार क्षेत्रमा सुरक्षा व्यवस्था कडा पारिएको छ।
