सुनसरीमा अनिश्चितकालीन कर्फ्यु जारी
सुनसरी । जिल्ला प्रशासन कार्यालय सुनसरीले जिल्लाको महेन्द्र राजमार्गअन्तर्गत इनरुवा बजार क्षेत्र र आसपासका क्षेत्रमा अनिश्चितकालीन कर्फ्यु आदेश जारी गरेको छ।
प्रमुख जिल्ला अधिकारी ईश्वरीप्रसाद अर्यालद्वारा जारी आदेशअनुसार साउन १२ गते दिउँसो ३:३० बजेदेखि अर्को सूचना जारी नभएसम्मका लागि स्थानीय प्रशासन ऐन, २०२८ को दफा ६(क) बमोजिम कर्फ्यु लागू गरिएको हो।
कर्फ्यु अवधिमा तोकिएको क्षेत्रभित्र कसैले पनि आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक तथा घेराउ गर्न नपाउने प्रशासनले जनाएको छ।
कर्फ्यु लागू गरिएको क्षेत्रको सीमा यसप्रकार रहेको छः
पूर्व: पकली चोकसम्म
पश्चिम: कोशी ब्यारेजको पुलसम्म
उत्तर र दक्षिण: महेन्द्र राजमार्गदेखि दायाँ–बायाँ २०० मिटर क्षेत्रभित्र
जिल्ला प्रशासन कार्यालयले सबैलाई कर्फ्यु आदेशको पूर्ण पालना गर्न आग्रह गर्दै सुरक्षा अवस्था सामान्य नभएसम्म आदेश कायम रहने जनाएको छ।
