मोरङमा भरुवा बन्दुक र १.५ किलो गाँजा सहित एक जना पक्राउ
मोरङ । मोरङको सुन्दरहरैँचा नगरपालिका–१० मुनालझोडामा भरुवा बन्दुक र लागूऔषध गाँजासहित एक जनालाई प्रहरीले पक्राउ गरेको छ।
जिल्ला प्रहरी कार्यालय मोरङका अनुसार साउन १३ गते राति करिब १०ः१० बजे लागूऔषध कारोबार भइरहेको भन्ने गोप्य सूचनाका आधारमा इलाका प्रहरी कार्यालय बेलबारीबाट खटिएको प्रहरी टोलीले सुन्दरहरैँचा–१० निवासी ५६ वर्षीय बलबहादुर राईको घरमा खानतलासी गरेको थियो।
खानतलासीका क्रममा घरको भान्सा कोठाभित्र लुकाइराखिएको अवस्थामा एक थान भरुवा बन्दुक तथा घर नजिकै रहेको गोठमा लुकाइराखिएको १.५ किलोग्राम लागूऔषध गाँजा बरामद गरिएको प्रहरीले जनाएको छ।
प्रहरीले भरुवा बन्दुक र गाँजासहित बलबहादुर राईलाई नियन्त्रणमा लिई इलाका प्रहरी कार्यालय बेलबारीमा राखेर थप अनुसन्धान अघि बढाएको जनाएको छ।
