कुटपिटबाट घाइते महिलाको उपचारका क्रममा मृत्यु, एक पक्राउ
वीरगञ्ज । पर्साको वीरगञ्ज महानगरपालिका–१४ पिपरा चिनिमिलमा कुटपिटबाट घाइते भएकी एक महिलाको उपचारका क्रममा मृत्यु भएको छ। घटनामा संलग्न एक जनालाई प्रहरीले पक्राउ गरेको छ भने अर्काको खोजी भइरहेको छ।
प्रहरीका अनुसार असार ३१ गते बिहान करिब १०ः५० बजे सडक विस्तारका क्रममा भत्किएको घरको इँटा हटाउने विषयमा भएको विवादले उग्र रूप लिँदा स्थानीय करिब ५० वर्षीया लिलावती देवीमाथि मनोज प्रसाद कुर्मी र लक्की प्रसाद पटेलले कुटपिट गरेका थिए।
घटनामा गम्भीर घाइते भएकी लिलावती देवीको नारायणी अस्पतालमा उपचार गरिएको थियो। उपचारपछि साउन ३२ गते साँझ डिस्चार्ज गरिएकी उनको साउन १४ गते साँझ स्वास्थ्य अवस्था पुनः बिग्रिएपछि फेरि सोही अस्पतालमा भर्ना गरिएको थियो। उपचारकै क्रममा साँझ ७ः२० बजे चिकित्सकले उनलाई मृत घोषणा गरेका हुन्।
घटनापछि प्रहरी चौकी गण्डकबाट खटिएको प्रहरी टोलीले कुटपिटमा संलग्न लक्की प्रसाद पटेललाई पक्राउ गरेको छ। फरार रहेका अर्का आरोपित मनोज प्रसाद कुर्मीको खोजी भइरहेको प्रहरीले जनाएको छ।
प्रहरीले घटनाबारे थप अनुसन्धान अघि बढाएको जनाएको छ।
