झापाको दमकबाट खैरो हेरोइन र ट्रामाडोल क्याप्सुल सहित तीन जना पक्राउ
झापा । झापाको दमकबाट खैरो हेरोइन र ट्रामाडोल क्याप्सुलसहित तीन जनालाई प्रहरीले पक्राउ गरेको छ।
जिल्ला प्रहरी कार्यालय झापाका अनुसार साउन १५ गते दिउँसो करिब ३:३० बजे दमक नगरपालिका–५ स्थित आकाशे पुल नजिक सार्वजनिक सडकमा लागूऔषध खरिद–बिक्री भइरहेको भन्ने विशेष सूचनाका आधारमा इलाका प्रहरी कार्यालय दमकबाट खटिएको प्रहरी टोलीले छापा मारेको थियो।
प्रहरीले को ३४ प २६८९ र मे ६ प १८२७ नम्बरका दुई वटा स्कुटरसहित तीन जनालाई नियन्त्रणमा लिएको जनाएको छ।
बरामद लागूऔषधमध्ये १ ग्राम ५२० मिलिग्राम खैरो हेरोइन र ट्रामाडोल हाइड्रोक्लोराइड (Tramal-50) लेखिएका ४ हजार ९६० क्याप्सुल रहेका छन्।
पक्राउ पर्नेमा सुनसरीको इटहरी उपमहानगरपालिका–२० तरहराका ३४ वर्षीय बुद्ध राई, मोरङको मिक्लाजुङ गाउँपालिका–२ की २३ वर्षीया रोमी लिम्बु र झापाको दमक नगरपालिका–७ का २२ वर्षीय करण मल्लिक रहेका छन्।
प्रहरीले पक्राउ परेका तीनै जनामाथि लागूऔषध सम्बन्धी कसुरमा थप अनुसन्धान भइरहेको जनाएको छ।
