पाख्रीबासमा विविध कार्यक्रम सहित मनाइयो विश्व आदिवासी दिवस
धनकुटा । नेपाल आदिवासी जनजाति महासंघ जिल्ला समन्वय परिषद् धनकुटाको आयोजनामा ३२औँ विश्व आदिवासी दिवस पाख्रीबासमा विविध कार्यक्रमसहित मनाइएको छ।
‘प्राप्त अधिकारको रक्षा आजको आवश्यकता, पहिचानसहितको समावेशी र न्यायपूर्ण नेपाल निर्माणमा हाम्रो साझा प्रतिबद्धता’ भन्ने नारासहित आयोजित कार्यक्रममा आदिवासी जनजातिको अधिकार, पहिचान, भाषा, संस्कृति र समावेशी सहभागिताका विषयमा चर्चा गरिएको थियो।
कार्यक्रमका वक्ताहरूले आदिवासी जनजातिले प्राप्त गरेका अधिकारको संरक्षण गर्दै थप अधिकारका लागि एकताबद्ध भएर अघि बढ्नुपर्नेमा जोड दिए। राज्यका सबै तहमा आदिवासी जनजातिको अर्थपूर्ण सहभागिता र समानुपातिक प्रतिनिधित्व सुनिश्चित गर्नुपर्ने उनीहरूको भनाइ थियो।
कार्यक्रममा पाख्रीबास नगरपालिकाका प्रमुख ज्ञानबहादुर गुरुङ, नेपाल पत्रकार महासंघ धनकुटाका अध्यक्ष विदुर खवास, महासंघका पूर्व तथा निवर्तमान अध्यक्ष, विभिन्न राजनीतिक दलका प्रतिनिधि, एकल जातीय संस्थाका प्रतिनिधि, जनजाति अगुवा तथा विभिन्न क्षेत्रका व्यक्तित्वहरूको सहभागिता थियो।
दिवसका अवसरमा समाज तथा विभिन्न क्षेत्रमा योगदान पुर्याउने व्यक्तिहरूलाई सम्मानसमेत गरिएको थियो। सम्मानित हुनेमा पाख्रीबास नगरपालिकाका प्रमुख ज्ञानबहादुर गुरुङ, समाजसेवी निरोज गुरुङ, जनजाति महासंघ पाख्रीबास नगर समन्वय समितिका लागि जग्गा उपलब्ध गराउने जग्गादाता अर्जुन गुरुङ, पूर्व नगर अध्यक्ष हरिबहादुर राई र थर्कमान श्रेष्ठ रहेका छन्।
कार्यक्रममा विभिन्न जातजातिको भाषा, संस्कृति र पहिचान झल्काउने सांस्कृतिक झाँकी तथा प्रस्तुतिहरू प्रस्तुत गरिएको थियो।
नेपाल आदिवासी जनजाति महासंघ जिल्ला समन्वय परिषद् धनकुटाका अध्यक्ष नवीनकिशोर शाक्यले दिवसका अवसरमा विभिन्न क्षेत्रमा योगदान गर्ने व्यक्तिहरूलाई सम्मान गरिएको बताए। उनले आदिवासी जनजातिको अधिकार, पहिचान, भाषा तथा संस्कृतिको संरक्षण र प्रवर्द्धनका लागि महासंघले निरन्तर काम गर्दै आएको जानकारी दिए।
