पहिरो खस्दा अवरुद्ध पृथ्वी राजमार्ग पूर्णरूपमा सञ्चालनमा
चितवन । चितवनको इच्छाकामना गाउँपालिका–५ सिमलधारास्थित पृथ्वीराजमार्गमा खसेको पहिरो हटाएपछि नारायणगढ–काठमाडौँ सडकखण्डमा सवारी आवागमन पूर्ण रूपमा सुचारु भएको छ।
गत साउन ३० गते राति करिब १०:२५ बजे सडक माथिबाट रुखसहितको सुख्खा पहिरो खसेपछि पृथ्वीराजमार्गको उक्त सडकखण्ड दुईतर्फी रूपमा अवरुद्ध भएको थियो।
सडक अवरुद्ध भएपछि सम्बन्धित निकायबाट पहिरो पन्छाउने कार्य गरिएको थियो। पहिरो हटाएपछि आज बिहान ६:४५ बजेदेखि नारायणगढबाट काठमाडौँतर्फ जाने तथा काठमाडौँबाट नारायणगढतर्फ आउने सवारीसाधनको आवागमन पूर्ण रूपमा सञ्चालनमा आएको हो।
सडक सञ्चालनमा आएसँगै पहिरोका कारण रोकिएका तथा उक्त सडकखण्ड हुँदै आवतजावत गर्ने सवारीसाधनहरू नियमित रूपमा सञ्चालनमा आएका छन्।
