जाजरकोटमा पहिरोमा परी बेपत्ता आमा–छोरा मृत फेला
जाजरकोट । जाजरकोटको भेरी नगरपालिका–२ फारुल्लामा पहिरोमा परी बेपत्ता भएका आमा–छोरा मृत अवस्थामा फेला परेका छन्।
शनिबार खसेको पहिरोमा परी बेपत्ता भएका रती खत्री र उनका छोरा ५४ वर्षीय ओमसिंह खत्री मृत अवस्थामा फेला परेका हुन्। पहिरोले घर तथा आसपासका क्षेत्रमा क्षति पुर्याएपछि उनीहरू बेपत्ता भएका थिए।
घटनामा अन्य ६ जना घाइते भएका छन्। घाइतेहरूको सुर्खेत तथा जाजरकोटस्थित अस्पतालमा उपचार भइरहेको जनाइएको छ।
पहिरोपछि सुरक्षाकर्मी तथा स्थानीयवासीको सहयोगमा खोजी तथा उद्धार कार्य गरिएको थियो। मृतक आमा–छोराको शव फेला परेसँगै घटनाबारे थप विवरण संकलन भइरहेको प्रहरीले जनाएको छ।
