लागूऔषध सहित झापा, मोरङ र सुनसरीबाट ७ जना पक्राउ
विराटनगर, भदौ ४ गते। झापा, मोरङ र सुनसरीबाट प्रहरीले लागूऔषध तथा प्रतिबन्धित औषधिसहित ७ जनालाई पक्राउ गरेको छ।
झापाको हल्दिबारी गाउँपालिका–२ कदमचोकबाट प्रहरी चौकी हल्दिबारीको टोलीले भद्रपुर नगरपालिका–७ का २८ वर्षीय सुबास राजवंशीलाई १ ग्राम ५५ मिलिग्राम ब्राउन सुगरसहित पक्राउ गरेको छ।
त्यस्तै, मोरङको पथरी शनिश्चरे नगरपालिका–१० संगम टोलबाट इलाका प्रहरी कार्यालय पथरीको टोलीले २३ वर्षीय घनश्याम बस्नेतलाई ५ ग्राम ८६० मिलिग्राम ब्राउन सुगरसहित पक्राउ गरेको छ।
यसैगरी, सुनसरीको इटहरी उपमहानगरपालिका–८ बाट प्रादेशिक अनुसन्धान समूह (PIT) र इलाका प्रहरी कार्यालय इटहरीको संयुक्त टोलीले चार जनालाई पक्राउ गरेको छ। पक्राउ पर्नेमा मोरङको पथरी शनिश्चरे नगरपालिका–५ का २६ वर्षीय निकेश माझी, इटहरी–८ का २२ वर्षीय युवराज विक, मोरङ केरावारी गाउँपालिका–१ का २१ वर्षीय रेजन विश्वकर्मा र झापा मेचीनगर नगरपालिका–८ का २१ वर्षीय सन्देश राउत रहेका छन्।
उनीहरूको साथबाट ट्रामाडोल ९४१ क्याप्सुल, डाइसाइक्लोमाइन १ हजार २३० ट्याब्लेट, ब्राउन सुगर ६०० मिलिग्राम, को ३६ प ५५४७ नम्बरको मोटरसाइकल र नगद ५३ हजार २१० रुपैयाँ बरामद गरिएको प्रहरीले जनाएको छ।
यस्तै, सुनसरीको धरान उपमहानगरपालिका–१६ बाट इलाका प्रहरी कार्यालय धरानको टोलीले २१ वर्षीय विदुर कार्कीलाई स्पास्पेन ४२८ ट्याब्लेट र ट्रामोल ५४८ ट्याब्लेटसहित पक्राउ गरेको छ।
पक्राउ परेका सबैमाथि थप अनुसन्धान भइरहेको प्रहरीले जनाएको छ।
